Peqqinnissakkut uppernarsaatinik paallaasseqatigiittarneq

Peqqinnissakkut sullissisut sulisinnaatitaanermut uppernarsaateqarnerat pillugu paasissutissanik paarlaasseqatigiitttarneq.

Pisimasoq aalajangersimasoq pissutaalluni piffissami sivisujaami tusagassiuutitigut Kalaallit Nunaanni nakkutilliisuutitap (Nunatsinni Nakorsaaneqarfiup) Qallunaat Nunaanni Sundhedsstyrelsimiit naammattunik paasissutissinneqarsimanera apeqquserlugu tusagassiuutitigut oqallittoqarpoq. Oqallinnerli ajoraluartumik paatsuuinertaqarpoq.

Nakorsat, kigutilerisut ernisussiortullu Kalaallit Nunaanni sulissagunik Qallunaat Nunaanni sulisinnaatitaanermut uppernarsaateqassapput. Tamatuma ass. peqqinnissakkut sullissisut siuliani pineqartut norskit svenskilluunniit - Kalaallit Nunaanni sulilersinnatik Qallunaat Nunaanni Sundhedsstyrelsimit sulisinnaatitaanermut uppernarsaammik tunineqaqqaarnissaannik nassataqarpoq.

Peqqissaasut Kalaallit Nunaanni sulissagunik Kalaallit Nunaanni sulisinnaatitaanermut uppernarsaateqartussaapput. Tamatuma ass. peqqissaasut danskit, norskit svensilluunniit Kalaallit Nunaanni sulisinnaatitaanermut uppernarsaammik Nunatsinni Nakorsaaneqarfimmut qinnuteqaqqaarnissaannik nassataqarpoq, sulisinnaatitaanermullu allagartaq pissarsiaritinnagu sulilersinnaanatik.

Qallunaat Nunaanni Sundhedsstyrelsip sulisinnaatitaanermut uppernarsaatillit nalunaarsorsimaffiat- nittartagaanni pissarsiarineqarsinnaasoq nutartertuagaraa. Peqqinnissakkut sullissisut Qallunaat Nunaanni sulisinnaatitaanermut uppernarsaateqartariaqarpata, pisortat atorfinititsisut Qallunaat Nunaanni sulisinnaatitaanermut uppernarsaateqarnerisa qulakkeernissaa pisussaaffigaat.

Peqqissaasunut tunngatillugu Kalaallit Nunaanni sulisinnaatitaanissamut uppernarsaasiinissamut tunngavissaqarnera Nunatsinni Nakorsaaneqarfiup qulakkeertarpaa. Norge-mi Peqqissutsimut Pisortaqarfik peqqinnissakkut sullissisunut nalunaarsuiffeqarpoq. Nunatsinni Nakorsaaneqarfik, peqqissaasut sulisinnaatitaanermut uppernarsaammik arsaartissimasut imal. sulisinnaatitaanikkut killiligaasimasut pillugit paasissutissanik Sverigimi Inunnik Isumaginninnermi Aqutsisoqarfimmit nassinneqartuarpoq. 

Taamaammat peqqinnissakkut sullissisut atuuttunik sulisinnaatitaanermut uppernarsaateqanngitsut, Kalaallit Nunaanni sulisinnaassanngillat.

Tusagassiutini sammineqartumi nakorsaq pineqartoq Kalaallit Nunaanni 2005-ip 2006-illu nikinneranni sivikitsumik Kalaallit Nunaanni sulinermini Qallunaat Nunaanni sulisinnaatitaanermut uppernarsaateqarpoq.

Peqqinnissakkut sullissisoq Qallunaat Nunaanni nakkutigineqarpat Kalaallit Nunaannilu suliniarpat, Qallunaat Nunaanni Sundhedsstyrelsen Nunatsinni Nakorsaaneqarfimmit suleqatigilluarneqartoq- attaveqartarpoq. Nakkutilliineq Nunatsinni Nakorsaaneqarfimmit nanginneqassaaq, peqqinnissakkullu sullissisup piumasaqaatit suut tunngavigalugit Kalaallit Nunaanni peqqinnissaqarfimmi sulisinnaanera naliliivigineqarluni. Taamatuttaaq Kalaallit Nunaanni peqqissaasutut sulisinnaatitaaneq killiliivigineqarsimappat sulisinnaatitanermulluunniit uppernarsaat arsaarinnissutaappat, Nunatsinni Nakorsaaneqarfiup nuna najugaqarfik attavigisarpaa.

Pineqartumi Nunatsinni Nakorsaaneqarfik 2005-imiit 2006-imut atorfininnginnerup nalaani nakkutigineqarsimasinnaanera pillugu Qallunaat Nunaanni Sundhedsstyrelsimit ilisimatinneqanngilaq, tamatuma nalaani ilumut nakkutilliisoqarsimanera Nunatsinni Nakorsaaneqarfimmit ilisimaneqanngilaq.

Nunat naalagaaffeqatigiinnerup iluani namminersorlutik oqartussat ilanngullugit nakkutilliissutitaasa akornanni paasissutissat naammaginartumik ingerlaarnissaat qulakkeerniarlugu, Nunani Avannarlerni suleqatigiinnermut Kalaallit Nunaat peqataavoq.

 

Paasissutissanik sukumiinerusunik pisariaqartitsisut Nunatsinni Nakorsaaneq Flemming Kleist Stenz oqarasuaatikkut: +299 345191 imal. e-mailikkut: flst@nanoq.gl. attavigisinnaavaat.