Ilinniartitaanermi, Kultureqarnermi Ilageeqarnermilu sipaarutissatut siunnersuutit

2015-imi Aningaasanut Inatsisissatut Siunnersuutip aappassaaneerneqarnissaanut atatillugu Ilinniartitaanermi, Kultureqarnermi Ilageeqarnermilu sipaarutissatut siunnersuutit

Pisortat aningaasaqarnerata isumannaatsumik ingerlanneqarnissaanik Naalakkersuisut anguniagaat tunngavigalugit Naalakkersuisunut ilaasortap Nivi Olsen-ip inassutigivaa ilinniartitaanerup, kultureqarnerup ilagiinnillu ingerlatsinerup iluani 11 mio. kr.-inik sipaaruteqartoqarnissaa.

Sipaarutissatut siunnersuutit taakkua 2015-imut Aningaasanut Inatsisissatut siunnersuutip aappassaaneerneqarnissaanut nassiunneqassapput.  Sipaarutissatut siunnersuutit suliarineqarneranni eqqumaffiginiarneqarsimavoq ingerlatsivinni ataasiakkaani / kontomi pingaarnermi pineqartumi piviusorsiornerunersoq sipaarutissat atortuulersinneqarsinnaanerat, sipaarutaasinnaasutut pineqartut aatsaat apriilip ingerlanerani nalunaarutigineqartussaammata, aatsaallu Inatsisartuni inaarutaasumik akuersissutigineqarsinnaallutik maaji qaammat. Tamannalu aamma pissutigalugu tulleriiaarinermi ingerlatsivinni assigiinngitsuni sipaarutissat ingerlatsinermut aningaasartuutit tamarmiusut procentinngorlugu annikitsumik nalilimmik aaqqiiniartoqarsimavoq. Tapiissutinut kontot assigiinngitsut procentinngorlugu qaffasinnersumik sipaarniarfigineqarsimapput.

Ilinniartitaanermi, kultureqarnermi ilageeqarnermilu ungasinnerusumut tunngasumik anguniakkat pillugit Naalakkersuisoq Nivi Olsen imatut oqaaseqarpoq:

”Ukiumut ataatsimut pingaarnertut sipaarutaasussat 11 mio. kr.-it ukiuni aningaasaliiffiusartussani tulliuttuni ataavartuussaasut naatsorsuutigineqarpoq. Uanga, Naalakkersuisut aammali soorunami naggataagut Inatsisartut soorunami periarfissaqarpugut 2016-imut aningaasanut inatsisissatut siunnersuutip suliarineqarneranut atatillugu suliassaqarfiit ataasiakkaat nammineq iluini allatut tulleriiaarissalluta. Uanga siunertaraara sipaarutaasut agguataarneri suliassaqarfinni nalilersoqqissallugit 2016-imut aningaasanut inatsisissanut siunnersuummut atatillugu, immikkullu eqqumaffiginiarlugu sipaarutissat suliassaqarfinnut allatut aaqqissuunneqarsinnaanersut, 2015-imut Aningaasanut Inatsimmut sanilliullugit, tassani tunngavigalugu maanna sipaarutissat aatsaat aningaasaqarnermut ukiup ingerlalereernerani maaji qaammat akuersissutigineqartussaanerat.”

Sipaarutissat suliarineqarneranni immikkut oqimaalutarniarneqarsimavoq kontoni pingaarnerni eqqorneqartuni aningaasanik atuisarnerup oqaluttuarsartaa, tamatumani aamma ingerlatsiviit namminersortut peqatigiiffiillu immineq ingerlasut aningaasanut inatsit aqqutigalugu ingerlatsinerminni imaluunniit suliniutinut tapiiffigineqartartut ukiumoortumik naatsorsuutaat aningaasallu nammineq pigisaat eqqarsaatigalugit. Tamannalu pillugu Naalakkersuisoq Nivi Olsen imatut oqaaseqarpoq:

”Sipaarutissat piviusunngortinniarneranni siunnerfigisimavara innuttaasut ataasiakkaat aamma ilinniagaqartut ataasiakkaat sapinngisamik annikinnerpaamik kiffartuusinerup ajorseriarsinnaaneranik misigisaqarnissaat, kiffartuussinermut maanna ingerlanneqartumut sanilliullugu. Soorunami tamanna tamakkiisuusinnaanngilaq, kisiannili sipaarutissat ukiuni arlaqartuni atuinikinneruffiusartuni imaluunniit ingerlatsivinni peqatigiiffinnilu ukiuni arlaqartuni sinneqartooruteqartarsimasuni aningaasanillu nammineq pigisaminnik katersisimasuni inissinnerisigut, neriuutigaara pisortat ingerlatsineranni  isumannaatsumik aningaasarsiornikkut ingerlatsisinnaasugut, ilutigisaanillu politikkikkut anguniakkatta sinneri angusinnaagigut.”


Annertunerusumik paasissaqarniaraanni Naalakkersuisup allattaa Jens-Frederik Nielsen oqarasuaat angallattagaq 560 299 aqqutigalugu attavigineqarsinnaavoq.