Islandimiut pisuussutinik atorluaaneq pillugu tikeraartut

Pisuussutit uumassusillit aningaasarsiornermut iluaqutaanerat aallaavigalugu suleqatigiinnissamik siunertaqarlutik Islandimiut nunatsinnut sapaatip akunnerani uani tikeraassapput. Islandimit tikeraat pisuussutinik uumassusilinnik atorluaanissamut immikkut ilisimatusarsimasut Namminersorlutik Oqartussani Naalakkersuisoqarfinnik arlalinnik, kommuninik suliffeqarfiutilinnik namminneerlutillu ineriartortitsisartunik ataatsimeeqateqassapput. Ataatsimiinnerni inuussutissanik aammalu allaat soorlu eqqakkanik atorluaanerusinneerput sammineqassasut, Birgitte Jacobsen, Aalisarnermut, Piniarnermut Nunalerinermullu Naalakkersuisoqarfimmi nunanik avannarlernik suleqateqarnermik ataqatigiissaarisoq oqarpoq:

- Islandimi Matís-ip ilisimatusarfianeersut, pisuussutinik uumassusilinnik atorluaanerunissamik, soorlu inuussutissanik uumasunullu nerukkaatissanik ineriartortitsinermik ilisimatusartusarsimasut tikeraassapput. Tikeraat peqatigalugit Kalaallit Nunaata, nunat avannarliit pisuussutinik uumassusilinnik aningaasarsiornikkut atorluaanerunissamik siunertaqarlutik suleqatigiinnerannut annertuumut peqataanera peqataanerunissaalu eqqartorneqassaaq.

Sooq Kalaallit Nunaata peqataanerunissaa pingaaruteqarpa?

Birgitte Jacobsen:- Kalaallit Nunaata nunani avannarlerni suleqatigiinnermut peqataanini tunngavigalugu pisuussutinik uumassusilinnik aningaasarsiornikkut atorluaanerunissaq siunertaralugu suliniuteqarnissamut assut soqutiginnippoq. Nunat avannarliit misilittagaqareersut, ilisimasanik isumassarsiorfissanik suleqatissanillu aallerfigineqarsinnaalluarput. Pisortaannaanngitsut aammali namminersorlutik suliffeqarfiutillit ineriartortitserusuttullu eqqarsaatigalugit.

Pisuussutit uumassusillit assigiinngitsuupput taamaammat eqqartugassasi suussappat?

Birgitte Jacobsen:- Eqqartorneqartussanut ilaavoq qeqqussanik atorluaanerusinnaaneq, aalisakkerivinni aalisakkat sinnikuinik eqqaaginnarnani sinnikunik panertitsilluni imaluunniit aalisakkat sinnikuinik tamulugassanngorlugit sikatsitaliorsinnaanerit, kiisalu soorlu aamma nunatsinni naasut isserinik qaqorsaasiorsinnaanerit, siornatigut aamma misileraaffigineqartareersut, aalisakkanik soorlu qaleralinnik qullukkiortarnerit allarpassuillu ineriartortinneqarsinnaasut eqqartorneqassapput.

Taava Islandimit tikeraat nunaminni nammineerlutik aningaasarsiutigisatik oqaluttuarissavaat?

Birgitte Jacobsen:- Islandimiut nunaminni uumassusilinnik atorluaallutik aningaasarsiuteqarnissartik siunertaralugu suliuteqartarnermikkut misilittagaqartupilussuupput. Annertuunik arlalinnik ataatsikkut suliniuteqartarnermikkut ineriartortitsisarnermikkullu sulianik nittarsaassinermut, tuniniaanermut kiisalu bioteknologimut tunngasunik ilisimasaqartupilussuullutik, misilittagaat ilisimasaallu tamakkua uagut ilinniarfigisinnaalluarpagut.

Uumassusilinnik atorluaanerusinnaaneq pillugu Islandimiullu ataatsimeeqatigiinnisap suna siunertaraa?

Birgitte Jacobsen:- Islandimitu ilisimatusarfimmit Matís-imeersut suliatik saqqummiutissavaat aammali neriuutigaat taamaaliornermikkut nunatsinni attaveqalerlutillu suleqatissarsisinnaanissartik. Nunatta nunat avannarliit issittullusoorlu Canadakkut pisuussutinik uumassusilinnik atorluaanerunissaq siunertaralugu suliniutigiinerannut peqataanerunissaa angorusuppaat. Ataatsimiinnissani pisortat, Namminersorlutik Oqartussat kommunillu saniatigut namminersortut suliffeqarfiit suliffeqarfeeqqallu peqataassapput, peqataarusuttullu soqutiginnittut allat aamma tikilluaqquagut. Soqutiginnittut uannut emalikkut saaffiginnissinnaapput uunga: bija@nanoq.gl

Birgitte Jacobsenimik apersuisuuvoq Else Olsvig Tusagassiivimmeersoq.