Aaja-mut aamma Juliane-mut akissuteqaat

Tusagassiuutitigut atuarneqarsinnaavoq Aaja Chemnitz Larsen Juliane Henningsenilu isumaqartut peqqinnissaqarfik tunulliunneqartoq allatut ajornartumik Ilaqutariinnermut Peqqissutsimullu ataatsimiititaliamik paasissutissiillunga ataatsimeeqateqarnissara allanngortariaqarsimagakku.

-”Isumaqarpunga Aaja aamma Juliane oqaramik peqqinnissaqarfik tunulliukkiga kukkusut, allatut ajornartumik Ilaqutariinnermut Peqqissutsimullu ataatsimiititaliamik paasissutissiillunga ataatsimeeqateqarnissara allanngortariaqarsimagakku, uangami nammineq ataatsimiititaliamik qaaqqusisuusimavunga” taamatut oqarpoq Peqqissutsimut Naalakkersuisoq, Martha Lund Olsen nangillunilu:

-”Taamatut ataasiarlunga ataatsimiinnermik kinguartitsisariaqarsimanera peqquteqarpoq inuttut namminermut tunngasumik allanngortinneqarsinnaanngitsumik suliassaqarama, kiisalu pinasuartumik isumasioqatigiinnissaq Aningaasaqarnermut ataatsimiititaliamut qaaqquneqarsimanera pillugu, taannalu allatut ajornartumik siulliuttariaqarsimavara. Ilaqutariinnermut Peqqinnissamullu ataatsimiititaliami ilaasortat aamma Aningaasaqarnermut ilaasortaapput, taamaasillutillu paasissutissiillunga ataatsimiisitsinissaraluara peqataaffigisinnaanagu.”

-” Paasissutissiillunga ataatsimiisitsinissara tallimanngorpat pissaaq, tassanilu eqqarsaatigaara uteqqissallugu assut nuannaarutigigakku Peqqinnissaqarfik Dorisip sulinngiffeqarnerani akisussaaffigisinnaagakku. Tamanna ajornartorsiutitut isiginngilara kisiannili iluaqutitut piffissami aalajangersimasumi peqqinnissaqarfik ilaqutariinnermillu naalakkersuisoqarfiit ataatsikkut tigummisinnaagakkit.”

Piffissami aggersumi Naalakkersuisut saqqummiussissapput atornerluisunut neqeroorut pillugu pilersaarummik, peqqinnissaqarfik isumaginninnerlu attuumassuteqarput tassuunalu qanimut suleqatigiinnissaq ataqatigiissaarinerlu pisariaqarluinnarluni.  Utoqqaat pillugit isumaginniffik aamma akisussaaffiupput peqqinnissaqarfimmit isumaginninnermullu attuumassuteqartut ataatsimullu siunertanik anguniagaqartut.

Paasissutissanik piniarluni attavigineqarsinnaavoq Peqqissutsimut Naalakkersuisoq Martha Lund Olsen allattaatigut Lea Holm ugguuna +299 346605 imaluunniit e-mail leah@nanoq.gl