Kommuneqarfik Sermersooq peqatigiinnermit tunuarluni nalunaaruteqarpoq

16-03-2015

Kommuneqarfik Sermersuumi kommunalbestyrelsimut ilaasortat tamakkerlugit kaammattorusuppakka KANUKOKA-mut ilaasortaajunnaarneq eqqarsaatigeqqeqqullugu pisortallu ataatsimoorlutik isumaqatigiinniartarnerat pillugu siunnerfilimmik tamatsinnut ajunnginnerpaaq anguniarlugu oqaloqatigiileqqullugit.

Ernummatigalugu ajuusaarutigalugulu Sermitsiaq nr. 10 martsip arferngani  saqqummersumi atuarpara Borgmester Asii Chemnitz Narupip nunatsinni kommunit inuttunersaat,  Kommuneqarfik Sermersooq, Kalaallit Nunatsinni kommunit kattuffiannit ilaasortaajunnaarsinniarlugu aalajangersimaneq aalajangiusimagaa. Aalajangiisoqarpoq kommunip ilaasortaajunnaarnerup kingunerisassai Naalakkersuisunut suli oqaloqatiginnissutiginngikkaalluunniit.

Immaqa borgmesteri isumaqalersimassaaq tamat oqartussaaqataanerat malinnianngikkiga nunatsinnut tamarmut tunngasut isumaqatiginninniutigerusunnginnakkit, pingaartumik Kommuneqarfik Sermersuumut.

Tamat oqartussaaqataanerat ajattunngisaannarpara. Tamanna nunatta alianaatsorsuup toqqammavigaa siuaasattalu ataatsimoorneq suleqatigiinnerlu pillugit ajugaasimaarutigalugit ileqquinut naapertuulluinnarpoq.

Qangaanilli aalisarnermik piniarnermillu inuussutissarsiutillit akornanni alliartorpunga meeraallungalumi ilikkareerlugu ataatsimoorluta nukittunerpaajusartugut imaani anorersuarsioraangatta taamatullu aamma qatsunganersioraangatta. Inuusuttuullunga umiartorninni ilikkarpara umiarsuaq ataasiinnarmik naalagaqarsinnaasoq. Umiarsuup naalagaa siunnerfiliisarpoq umiarsuullu sumunnarnissaa aalajangertarlugu. Kalaallit Nunaanni Inatsisartut naalagaraavut, inunnit naqisimaneqanngitsunit qinigaasut, Inatsisartullumi tassaapput sumik siunnerfeqarnissatsinnik aalajangiisartut siunissamilu sumut sammiveqarnissatsinnik tikkuussisartut.

Kommuneqarfik Sermersooq KANUKOKA-mut ilaasortaaginnaqqullugu ilaasortaajunnaaqqulluguluunniit pinngitsaalissallugu kissaateqanngilanga. Oqaannarpunga malittarisassat inatsisillu Inatsisartunit aalajangerneqartut malinniarlugit, tamannami tamat oqartussaaqataanerannut naleqqunnerpaatut isumaqarfigigakku.

Kommunalbestyrelsi KANUKOKA-mut ilaasortaajunnaarnissamik aalajangiineq sioqqullugu ilisimatinneqarpoq KANUKOKA kommunit sinnerlugit Namminersorlutik Oqartussanut isumaqatiginninniarsinnaatitaammat, ataatsimoortumik tapiissutit isumaqatigiissutillu eqqarsaatigalugit, inatsisinilu tunngavigineqarmat ataasiinnaq kommunit sinnerlugit isumaqatigiinniartassasoq.

Soorunalimi kommunit nammineerlutik aqutsisinnaatitaanerat ataqqivara, kisiannili tupigusuutiginngitsoorsinnaanagu borgmesteri taama erseqqitsigisumik oqarmat ingerlatsinermi malittarisassat Inatsisartunit akuersissutigisaasut malinnissaat kissaatigineqanngitsoq.

Maannakkut borgmesterip uagut uparuartulerpaatigut Kommuneqarfik Sermersuup kommunalbestyrelsiani amerlanerussuteqartut kissaatigisaattut iliunnginnatta, allamillu iliuuseqarani pisortat ataatsimoorlutik isumaqatigiissutaasa isumaqatigiinniutigineqartarnerat pitsaasoq sussakkeerlugu.

Isumaqatiginninniariaaseq tamarmiusoq ingerlaannassasoq nukittorsarneqarlunilu kissaatigaara. Taamaammat Kommuneqarfik Sermersooq kaammattussavara ilaasortaajunnaarnertik isumaliutigeqqeqqullugu taamatullu tamatsinnut pitsaanerpaaq anguniarlugu pisortat ataatsimoorlutik isumaqatiginninniariaasiannut akornutissaajunnartut siunnerfilimmik oqaloqatigiissutigeqqullugit.

Taamatut oqaloqatigiinnermut peqataarusulluinnarsinnaavunga upperilluinnarparalu aammattaaq KANUKOKA kommunillu allat taamaaliorusussasut.

Suleqatigiinniarta! Ataatsimoorutta nukittunerussaagut.

Kim Kielsen, Naalakkersuisut  Siulittaasuat