Peqqinnissaqarfiup sumiiffinni ilinnut neqeroorutai

Sumiiffigisama peqqinnissaqarfiani pilatsissinnaavunga? Uanga illoqarfigisannut immikkut ilinniagallit nakorsat qanoq akulikitsigisumik tikittarpat? Uanga nunaqarfigisanni inuunerissaaveqarpa? Apeqqutit tamakku  peqqinnissaqarfiup sullissinermik quppersagaani akissutisisinnaavatit, tassani nunap immikkoortuini tallimaasuni peqqinnissaqarfiusut peqqinnissamik ilinniarsimasut sutigut sullissisinnaanerinik nassuiaateqarluni.

-”Sullissinermik quppersagaq Naalakkersuisunut sakkussaalluartuuvoq, peqqinnissaqarfimmut tunngasunik naalakkersuinermi anguniakkat aamma peqqinnissaqarfiup neqeroorutaasa akornanni naapertuuttoqarnera qulakkiissagutsigu. Assersuutigalugu naalakkersuisooqatigiinnermik isumaqatigiissummi anguniagaavoq, immikkut ilinniarsimasunik angalasunik minnerpaamik ukiumut ataasiarlutik illoqarfinni tamani nunaqarfinnilu anginerusuni peqqinnissaqarfiup  katsorsaanerit ingerlattassagai. Sullissinermik quppersakkami takusinnaavarput, periarfissaqartillugu taamatut neqerooruteqarneq peqqinnissaqarfiup ilanngussimagaa", Peqqissutsimut Naalakkersuisoq Martha Lund Olsen oqarpoq nangillunilu:

-”Naalakkersuisut kissaatigaat peqqinnissaqarfiup innuttaasunut neqeroorutai ersarissuutinneqassasut ammasuutinneqarlutillu. Peqqinnissaqarfiup sullissinera pillugu paasissutissat pissarsiariuminartuunissaat pingaaruteqartuuvoq, peqqinnissaqarfiup neqeroorutigisinnaasai suunersut illit uangalu ilisimaniassagatsigit taamaalillutalu illoqarfigisatsinni nunaqarfigisatsinniluunniit peqqinnissamut neqeroorutit piviusorpalaartumik naatsorsuutigisinnaallutigu."

Nunap immikkoortuini peqqinnissaqarfiit assigiinngitsut peqqinnissamik ilinniarsimasut sullissineri suunersut sullissinermik quppersakkami nassuiarneqarput. Immikkut ittumik sullissinerit Dronning Ingrid-ip Napparsimmavissuani suliarineqartartut quppersakkami ilanngunneqanngillat.

-”Peqqinnissaqarfiup anguniagaraaa illit innuttaasutut sullissinitsinni allatulli assigiimmik atugaqarsinnaanerit. Avinngarusimasuni sundhedsassistent-itut ilinniarsimasunik sulisoqarpugut kiisalu tele medicin atorlugu nakorsiartitsineq neqeroorutaavoq nunap immikkoortuini imaluunniit peqqinnissaqarfiup qitiusumik immikkoortortaqarfianiit peqataatitaqarnikkut. Peqqinnissaqarfiup nalilerpagu, nakorsartilluni sullissinermik suli pisariaqartitsisoqartoq, soorunami innuttaasutut pisinnaatitaaffeqarputit sullissinermi neqeroorutit nunap immikkoortortaqarfiup peqqissaaviani malillugit sullinneqarnissannut, " Peqqinnissamut Pitsaaliuinermullu Aqutsisoqarfimmi nakorsaaneq, Anne-Marie Ulrik oqarpoq.

Innuttaasut nuttarneri ingerlaavartumik allanngorartuummat peqqinnissamik ilinniarsimasut sullissineri aamma allanngorsinnaassapput. Taamaattumik sullissinermik quppersagaq inaarutaasumik allakkiaanngilaq, tassaallunili peqqinnissaqarfiup maannakkut siunissamilu qaninnerusumi sullissinera pillugu takussutissaq. Peqqinnissaqarfimmi suliniutit nutaat atuutilertarneri malillugit, imaluunniit innuttaasut nikerartarneri allanngoraangata, peqqinnissamik ilinniarsimasut sullissineri naleqqussarneqassapput.

Peqqinnissaqarfiup nittartagaani www.peqqik.gl-imi illit sumiiffigisanni peqqinnissaqarfiup neqeroorutai atuarsinnaavatit.

 

Suli paasisaqarusukkuit nakorsaaneq Anne-Marie Ulrik  tlf: +299 34 43 00 imaluunniit e-mail: amu@peqqik.gl attavigineqarsinnaavoq.