Kalaallit puisimit tunisassiaat Japanimi tuniniarneqartut

Puisit amiinit tunisassiat

Naalakkersuisut siulittaasuata Kim Kielsenip aamma Piniarnermut, Aalisarnermut Nunalerinermullu Naalakkersuisup Karl-Kristian Krusep Japanip illoqarfiisa pingaarnersaanni Tokyomi Kalaallit Nunaannik nittarsaatitsinerat ullunik pingasunik sivisussuseqartoq naammasseqqammerpaat. Tikeraarneq – Kunngissaq Frederimmit nulianillu Marymit aamma peqataaffigineqartoq – Kalaallit aalisakkanik qalerualinnillu, puisip amiinik, takornariaqarnermik kultureqarnermillu tuniniaalluni seminareqartitsinermik imaqarpoq saniatigullu assigiinngitsorpassuarnik sammisaqartitsinertaqarluni.

Arfininngornikkut marsip 28-anni nittarsaassinerup ulluisa naggataavanni Mode Gakuenimut pulaarfiuvoq. Tassani Kim Kielsenip aamma Karl Kristian Krusep kunngissakkut ilagalugit alakkarterpaat puisit amii Kalaallit Nunaanneersut qanoq japanimiutut nutaaliamik atisaliorneqarsimanersut. Atisanik mutiliortartut inuusuttut japanimiut naggataarutaasumik soraarummeeramik puisit amii sammissallugit toqqarsimavaat.

Tamatuma kingorna niuertarferujussuarmi Tokyu Honten-imi Great Greenlandip atisaliortitai nutaanerpaat Jesper Høvringip ukioq manna suliarisimasai nitaarsaanneqarput. Taakku aamma ukioq manna siusinnerusukkut Copenhagen Fashion Weekimi takutinneqarput.  Kingornatigullu soqutiginnittut atisalianut taakkununnga inniminniinissamut periarfissinneqarput.

Suliffeqarfiit Nunatsinneersut Japanimi nittarsaanermi peqataasut annertuumik soqutigineqarnertik iluarisimaarpaat. Kim Kielsenip Karl Kristian Krusellu soqutiginninneq pilersitaat kunngissakkut annertuumik sunniuteqarfigisaat immikkooruteqarluinnarsimavoq.

Tassunga atatillugu Kim Kielsen ima oqarpoq:

”Naak Nunatsinniit suliffeqarfiit japanimi tunisilluareeraluartut, neriuutigaara angalanerput manna aqqutigalugu Nunatsinnut soqutiginninneq suli annertusissasoq, suliffeqarfiillu pioreersut ilisimaneqarluarnerulissasut, aamma suliffeqarfiit nutaajusut japanimi niuernermut akoorusullutik appakaakkiartortut ilisarisimaneqarluarnerulissasut”.

Suliffeqarfiit nittarsaassisut assigiinngiiaartut, soorlu aalisakkanik qalerualinnillu tunisassiortut, puisip amiinik sanaanik tunisassiortut, umimmaat qiviuinik oqorsaasiortartut takornarialerisullu iluatsilluarsimaqaat. Saniatigullu kulturikkut aaqqissuussat iluatsilluarsimaqaat, japanimiullu Kalaallit Nunaata sussusianut qaammaassaqarnerat suli annertusineruinnarsimavoq.

Aqqissuussani tulleriiaartuni kingulliullugu nittarsaanneqarpoq Kalaallit kulturiat, tassanilu eqqumiitsuliortup Nuka Godtfredsenip atuakkiami saqqummersimasut siullersaat ”Qanga – tutineq siulleq”  japanimiusuumut nutserneqarsimasoq saqqummersippaa, taannalu maanna japanimi pisiniarfinni pisiarineqarsinnaalerpoq.

Paasisaqarnerorusuttut attavigisinnaavat Tusagassiivimmi pisortaq Paornànguaq Kleist oqarasuaat +299 34 51 59 imaluunniit e-mail paok@nanoq.gl.