Urani pillugu paasisitsiniaaneq 2015

Urani pillugu paasisitsiniaaneq 2015 – ullut ataatsimiiffissat allanngorneri

Ippassaq marsip 23.-anni silapilunnera pissutigalugu ataatsimiinnissat unitsiinnarnerisa kingorna Kujataani innuttaasunik ataatsimiisitsinernut nutaanik piffissaliussisoqarpoq. Maannakkut innuttaasunik ataatsimiisitsinerit pissapput

Narsap Timersortarfiani 24. marts, nal. 19

Qaqortoq 25. marts nal. 19 katersortarfimmi

Nanortalik 26. marts nal. 19 katersortarfimmi

Juuni 2014-mi innuttaasunik ataatsimiisitsinertulli politikkikkut peqataatitaqarani ingerlanneqassapput. Illoqarfinni tikeraarneqartuni innuttaasut uranimik misissuineq atuinerlu pillugu tusagaqartinnissaat siunertaralugu aaqqissuunneqarput. Oqalugiartussat tassaapput immikkut ilisimasaqarfimminni, geologiimi, avatangiisinik illersuinermi, aatsitassarsiornermi innuttaasunillu ilanngussuinermi ukiorpassuarni misilittagaqartutut ilisimatuut misilittagaqarluartut.

Angalanissamut tunngavissiipput Vittus Qujaukitsoq, Andreas René Uldum aamma Mala Høy Kúko, tassaasut Inuussutissarsiornermut, Suliffeqarnermut Niuernermut Nunanullu allanut Tunngasunut, aamma Aatsitassanut Aningaasaqarnermullu, kiisalu Pinngortitamut, Avatangiisinut Inatsisinillu Atuutsitsinermut Naalakkersuisuni ilaasortat.