Naammagisimaarinninneq

Franskit ministeriata tikeraareernerata kingorna naammagisimaarinninneq

Ulluni ataasinngorneq ulloq 23. martsimiit marlunngorneq ulloq 24. martsimut Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq, franskit nunanut allanut ministeriat Laurent Fabius aamma danskit nunanut allanut ministeriat Martin Lidegaard, susassaqarfiit ataatsimoorlutik soqutigisaqarfigisatik oqaluuseriniarlugit Ilulissani naapipput.

Silap pissusaata allannguutai, issittumi ilisimatusarnermi suleqatigiinneq, piujuartitsisussamik piniarneq aalisarnerlu, EU-p Issittumi aningaasaliineri aammalu Issittumi Siunnersuisooqatigiit iluanni suleqatigiinneq pillugit apeqqutit ataatsimoorluni pingaartinneqartut oqallisiginiarlugit Vittus Qujaukitsup aamma Martin Lidegaardip franskit nunanut allanut ministeriat qaaqqusimavaat.

Ataatsimiinnerit Ilulissani ingerlanneqarput, tamannalu qulequttat pingaaruteqartut taakkua oqallisiginissaannut, peqatigisaanillu silap pissusaata allannguutaasa annilaarnartumik ersarissumillu sunniuteqarnerisa franskit nunanut allanut ministeriannut qanimut takutinnissaannut periarfissiivoq. 2015-imi decembarimi silap pissusaata allanngoriartornera pillugu nunat siuttuisa ataatsimeersuarnerannut tullermut Frankrig qaaqqusisuussaaq.

Ataatsimiinnerit aalajangersimasumik kingunerisaannik, Kalaallit Nunaanni suliffissuaqarnermi suliniutini Europamiut aningaasaliisarneri qanoq iliorluni annertusiteqqinneqarsinnaanersut, ilanngullugu Frankrigip eqeersimaartumik suliniarnera aqqutigalugu, misissorniarlugu, ministerit pingasut taakkua ataatsimoorlutik neriorsuipput.

Inuussutissarsiornermut, Suliffeqarnermut, Niuernermut Nunanullu Allanut NaalakkersuisoqVittus Qujaukitsoq, tikeraartoqarnerup kingorna oqarpoq:

”Ullut qanoq ingerlasimanerat naammagisimaartorujussuuara. Franskit nunanut allanut ministeriata tikeraarnerata, Issittoq pillugu Frankrigimik oqaloqateqarnitta ingerlareersup inerisaqqinneqarnissaanut periarfissippaatigut. Inuiaqatigiinni piujuartitsisussamik ineriartortitsinissaq siunertaralugu, EU-mut aamma Frankrigimut attaveqarluarnitta qulakkeernissaa Naalakkersuisut takorluugaraat.

Periarfissani taamaattuni EU-mut aammalu nunanut Frankrigitut ittunut Kalaallit Nunaanni piujuartitsisussamik piniarneq aalisarnerlu qanoq inuiaqatigiinni nukittorsaanermut iluaqutaanersut, aammalu EU-p puisit amiinik inerteqquteqarnera qanoq nunatsinni piniartut inuuniarnerannut qanoq sunniinersoq, nassuiaatigissallugu pissusiviusullu takutissallugit pingaaruteqarpoq.

Ataatsimoorluni pingaartitavut aallaavigalugit aammalu assigiinngissutivut ataqqillugit suleqatigiinnissamut aqqutissiuussisumik, naligiimmik suleqateqarnissaq soqutigisaraarput. Unammilligassat Kalaallit Nunaanni nalaattakkatta, kisiannili peqatigisaanik periarfissaqarfiusut takkuttartut aammalu periarfissat siunissami suleqatigiinnitsinni takusinnaasavut, aamma inuussutissarsiornermut suliassaqarfiup iluani, periarfissaqarfiusunik annertoorujussuarnik atuiffiunngitsut, erseqqissarnissaannut franskit nunanut allanut ministeriata tikeraarnera atorluarpara”.

Paasissutissanik annertunerusunik piniarnermi attaveqarfissaq: Rebecca Lynge, oqarasuaammut +299 553328 imaluunniit e-mail rejl@nanoq.gl

 

Ilanngussaq (KAL)

Ilanngussaq (DK)

Ilanngussaq (Tuluttut)