Avammut tunisassiornerup siuarsarniarlugu Japanimiinneq

Naalakkersuisut Siulittaasuat Kim Kielsen aamma Aalisarnermut, Piniarnermut Nunalerinermullu Naalakkersuisoq Karl-Kristian Kruse niuerneq siuarsarniarlugu ulluni 25.-29. marts 2015 Japanimiissapput, qalerualinnik nunatsinneersunik puisillu amiinit tunisassianik kiisalu takornarissat amerlanerusut nunatsinnukarusulersinnissaat siunertaralugu angalasoqarluni.

Kunngissakkut peqatigalugit Japanimut tikeraarnermi nunatsinni inuussutissarsiorneq kulturilu sammillugit aaqqissuisoqarpoq.

Japanimiut kalaallillu ullumikkut suleqatigiinnerat Polar Seafoodip aamma Royal Greenlandip qalerualinnik Japanimut tuniniaanerannik imaqarpoq. Japan niuerfigissallugu nunatsinnut soqutiginaateqarpoq – nunat Asiamiittut allat peqatigalugit – Japanimi pisisartorpassuaqarmat, akunnattumik aningaasarsiallit ilanngullugit. Taakkuuppullu nunatsinnit nerisassianik nuerfigissallugit soqutiginaateqarluinnartut.

Kalaallit kulturiat sammillugu
Nunatsinni inuiaqatigiinni ilukkut tarnikkullu tunngasut aallaavigalugit saqqummersitsineq ulloq 27. marts 2015 ammarneqassaaq. Kunngikkormiutut ataqqinassusilik Prinsgemalen aamma Kunngikkormiutut ataqqinassusilik prinsesse Takamado kiinarpaat tupilaallu nunatsinneersut inussiarnisaarlutik atukkiussimavaat. Saqqummersitsinermi etnografimut tunngasunik aamma immikkoortortaqassaaq, aammalu Nunatta Katersugaasiviata saqqummersitaa "Qanga - tegnet fortid", nunatta oqaluttuarisaanerannik atuakkiamut Nuka Godtfredsenip akvareliliaanik imaqartoq.

Nipilersortartut Nanook aamma Nive Nielsen and the Deer Children aamma angalaqataapput, taakkulu aallartitaqarfimmi tikilluaqqusilluni katerisimaartitsinermi appisimaassapput. Nipilersortartut kalaallit aamma Japanimiunut tamanut aaqqissuussami tusarnaartitsissapput.

Suliffeqarfiit eqqumiitsuliortullu makku Japanimut peqataapput:
Royal Greenland, Polar Seafood, Great Greenland, Air Greenland, Grønlands Rejsebureau, Hotel Arctic, World of Greenland, Visit Greenland, World of Greenland, Arctic Circle, Qiviut, Kumi Consult, KNAPK, Nanook, Nive Nielsen and the Deer Children, Atlantic Music, Sermitsiaq.ag, Icelandair, Albatros Travel, Greenland & Iceland, Travel Service, Arctic Adventure, Viking (Japan), Kopenhagen Fur, Nuka Godtfredsen.


Paasisaqarnerorusuttut attavigisinnaavaat Tusagassiivimmi pisortaq Paornánguaq Kleist oqarasuaat + 34 50 00 imaluunniit e-mail paok@nanoql.gl.