Sakialluut TB Kalaallit Nunaanni suli ajornartorsiutaaqaaq

Nappaat annertoqisumik iliuuseqarfigineqaraluaq nunarsuaq tamakkerlugu TB-ip atugaanera suli ernumatitsivoq. 2013-imi nunarsuaq tamakkerlugu inuit 9 millionit tunillatsipput millionillu aappa affaasa toqqutigalugu.
Kalaallit Nunaanni nappaat suli akiorniarsaraarput. 2014-imi 95-it TB-mik tuniluuttumik nappaateqarnerat paasineqarpoq.

TB nappaataavoq tuniluuttoq tappiorannartunik bakteerissanik Mycobacterium Tuberculosis-inik patsiseqartoq. TB amerlanernit sakialluutitut ilisimaneqarpoq, timilli pisatai allat TB-mik nappaateqarfiulersinnaapput. Tappiorannartut kuseriarnernit isaannarmik takujuminaatsunit quersornikkut tangajornikkullu siaruaanneqartunit- tuniluuttarmata, sakialluut kisimi tuniluuttuuvoq. TB-ip tappiorannartua ukiorpassuarni timimiissinnaasarpoq kingornalu nappaammut akiuussinnaatsutsip sanngiillinerani utoqqalinermiluunniit nappaataalersinnaasarluni.

Ajoraluartumik Kalaallit Nunaanni TB-ip atugaanerata annikilliartorneranut takussutissaqarpianngilaq. Kalaallit Nunaalli periarfissagissaarpoq – nuna tamakkerlugu TB akiorniarlugu iliuusissanik siunniussineq nukittooq, Peqqinnissaqarfik tunniusimasoq, nappaammik suussusersiniaanermi periarfissat nutaat politikkikkullu tapersersorneqarneq.

Unammilligassalli annikitsutut nalilerneqassanngillat. Nappaatip atugaanerata akuerineqarsinnaasumut killiffissaanut aqqut takeqaaq, nungutivinnissaannullu aqqut suli takinerulluni.

TB-pillugu ajornartorsiutip peqqinnissaqarfimmit kisermaallugu aaqqiivigineqarsinnaannginnerata paasinissaa pingaaruteqarpoq. Ajornartorsiutit angerlarsimaffeqanngitsoqarneratut ittut sivisuumik TB-mut nakorsartinnissamut ajornakusuulersitsisuupput. TB-mik tuniluuttumik nappaatillit angerlarsimaffeqanngitsut illoqarfinni arlalinni- pingaartumillu Nuummi annertuumik tuniluutsitsisuupput. Nappaat nungutivissagaanni ineqarnikkut atugassarititat pitsanngorsartariaqarput, suliffissaaleqineq annikillisinneqartariaqarpoq pissakinnerillu nalinginnaasutigut pitsaanerusunik atugassinneqartariaqarlutik.Taamaammat iluatitsilluarnissamut aqqut annertuunik-, sivisuunik-, ataavartunillu pisortaqarfinnit qitiusunit, peqqinnissaqarfimmit innuttaasunillu namminernit iliuuseqarfigineqarnermik tunngaveqassaaq.
Marlunngorneq marsip ulluisa 24-at tassaavoq nunarsuaq tamakkerlugu TB-mut ullorititaasoq ”World TB Day”. TB-mik akiuiniarnermi angusaqassagaanni nappaatip inuiaqatigiinnit sammineqarnissaa pisariaqarluinnarpoq.

TB qanoq ililluni tunillaattarpa? Nappaammut ersiutit suuppat? Qaqugu nakorsiartariaqassaanga? Kalaallit Nunaanni illoqarfik suna TB-mik nappaateqarfiunerua? Apeqqutinut taakkununnga akissutit nittartakkami www.tuberkulose.gl-imi pissarsiarisinnaavatit

Annertunerusumik paasisaqarusukkuit saaffigineqarsinnaavoq Thomas Rendal, oqa. +345192 imaluuniit nun@nanoq.gl