Piniarneq pillugu siunnersuisoqatigiinnit oqaaseqaat

Piniarneq pillugu siunnersuisoqatigiit ukioq manna siullermik ataatsimiipput 12. marts 2015, piniarnermullu tunngasut arlallit ataatsimiinnermi eqqartorneqarput.

EU Kommissionip puisinit tunisassiat pillugit Inuit ilaatinneqannginnissaat pillugit maleruagassat sukannernerulersinneqarnissaannut siunnersuut Siunnersuisoqatigiit akuerinnaanngilaa
Piniarneq pillugu siunnersuisoqatigiit EU Kommissionip ilaatigut Inuit ilaatinneqannginnissaat pillugu peqqussutip allanngortinneqarnissaanut siunnersuummut ilisimatinneqarnerminni siunnersuut sakkortuumik akuersaanngilaat. Siunnersuut puisinniarnermik inuussutissarsiuteqartunut pitsaanngitsumik naleqqutinngitsunillu amerlasuunik kinguneqartitsissaaq. ”Millionilikkaanik puisaateqarpugut, sooq pisuussut piujuaannartitsilluni atuinermik ingerlanneqartoq niuernikkut akornusersoqassava? Siunnersuut silaqassutsimut naleqqutinngilaq arlaannaatigulluunniit akuerineqarsinnaanngilaq”, taama oqarpoq Piniarneq pillugu siunnersuisoqatigiit siulittaasuat Lars Heilmann, Qeqertarsuaq. Siunnersuisoqatigiit Naalakkersuisut qinnuvigai isumalluutit naammattut siunnersuummut akiorniarneqarnissaanut immikkoortissagaat.

Tassunga atatillugu Piniarnermut Naalakkersuisoq Karl-Kristian Kruse-p INUIT SILA qaammarsaaniummut aningaasaliissuteqarniarluni sulinera Piniarneq pillugu siunnersuisoqatigiinnit tapersersorneqarpoq. Tassami qaammarsaaniarluni suliniut siunertani naapertorlugu sunniuteqarsimavoq, taamaattumik Siunnersuisoqatigiinnit innersuussutigineqarpoq suliniut ukiuni amerlasuuni suli ingerlanneqassasoq.

Qilalukkat qaqortanik qernertanillu atuineq
Aammattaaq Piniarneq pillugu siunnersuisoqatigiit piniakkat killilersukkat naleqqussarneqarnerat eqqartuiffigaa. Qilalukkanik qaqortanik qernertanillu 2004-mi pisassiisoqartalerpoq. Apeqqusertariaqarpoq qilalukkat qaqortat qernertallu suli nungutaanissaminnut ulorianartorsiortinneqarnersut, aamma sukannersumik killilersuineq ingerlaannartariaqarnersoq, taama aperivoq Siunnersuisoqatigiit siulittaasuat Lars Heilmann. Piniakkat pillugit piniartut ilisimasaat katersorneqartariaqarput uumassusilerisullu ilisimasaannut sanilliunneqarlutik. Pingaaruteqarpoq uumassusilerisut piniartunik suleqateqarnissaat piniartullu nalunaarutigisaat pillugit upperineqarnissaat.

Arferit angisuut
Piniarneq pillugu siunnersuisoqatigiit aammattaaq arfernut pilattarfiit amigaatigineqarnerat eqqartorpaat, soorlu amoortaatinik anginerusunik aamma eqqiluisaarnermut tunngasut. Atortunik pitsaanerusunik peqarnikkut pisuussutitsinnik annertunerusumik atuinerput pitsanngortissinnaavarput.

Tamatuma saniatigut arferup neqaanik atuinerup ineriartortinneqarsinnaanera, soorlu qallersuusialiarineqarsinnaanera Siunnersuisoqatigiinnit tikkuarneqarpoq. Miluumasut imarmiuneersunik tunisassianik ineriartortitsinermi Neqi A/S-imik pitsaanerusumik suleqateqarneq kissaatiginartinneqarpoq.

Timmiarniarnermut atatillugu amerlasuut sisaat atorneqarnerat
Siunnersuisoqatigiinni amerlasuut sisaat atugaanerat eqqartorneqarpoq. Amerlasuut sisaat ullumikkut atorneqarput, amerlasuut aqerlunik sananeqaatilinnut taarsiullugit, taakku inerteqqutigineqarlernikuupput inunnut peqqissuunissamut ulorianaataat, kiisalu pinngortitap mianerineqarnissaa peqqutigalugu.

Paasinarsisimavoq amerlasuut sisaat atorneqarnerat ajornartorsiutitaqarfiusoq. Amerlasuut sisaat oqinnerupput aqerlunik sanaanut sanilliullugit, taamalu seqqornermi qaninnerusarlutik. Misilittakkat takutippaat aqerlut sisaat atorneqarnerini timmissat pissatat amerlanerusut. Aamma patruunit sisammik amerlasuullit aallanngitsoortarneri amerlanerupput.

Piniarneq pillugu siunnersuisoqatigiit isumaqarput amerlasuunik sisannik atuinermi, timmissat pissatat amerlaneruneratigut uumasunik atugarissaarneq minnerulersoq. Ilaatigut takuneqarsinnaasarput amerlasuut sisaat timmissanut itinerusumik pulaneq ajortut. Taamaattumik Naalakkersuisut amerlasuunik sisannik sanaanik atuineq isumaliuutigeqqittariaqarpaat aamma allanik atorneqarsinnaasunik periarfissarsiorlutik.

Piniarneq pillugu siunnersuisoqatigiit maluginiarpaat Norge-mi aamma pitsaanngitsumik kinguneqarsimanera eqqarsaatigalugu amerlasuut sisannik atuilersimaneq atorunnaarsinneqassanersoq eqqarsaatigineqartoq. Siunnersuisoqatigiinnit Norgemiut amerlasuut sisaat pillugit qanoq isummissanersut malittarineqarnissaa kissaatigineqarpoq.

Siunnersuisoqatigiit amerlasuut sisaat atorneqarnerat pillugu misissuisoqarnissaa soorlu apersuilluni misissuisoqarnissaa kissaatiginartippaat, tamannalu Pinngortitaleriffik suleqatigalugu pisinnaavoq, timmissanut pitsaanngitsumik kinguneqarnera uppernarsarneqarniassammat.

Sukumiinerusumik paasisaqarusukkaanni, saaffigisassaq: Lars Heilmann, Piniarneq pillugu siunnersuisoqatigiit siulittaasuat