Sanaartornermut pilersaarutinut aqqutissaq pitsaanerusoq

Oqaloqatigiinneq, illuatungeriittut eqqarsarneq pilersaarutinillu ataatsimoortumik isiginninneq. Oqaatsit taakku tassaapput isumasioqatigiinnermi qanittumi pisumi qulequtarineqartut, aaqqissorneqartumit Aningaasaqarnermut Naalakkersuisoqarfimmit, nunatsinni kommunit tamarmik kiisalu Namminersorlutik Oqartussat naapeqatigiinneranni peqataaffigineqartumit, pilersinneqarusullutik sinaakkutissat pitsaanerusut qanoq iliornikkut kiisalu aqqutissat suut atorlugit sanaartornermut aningaasat agguaanneqartarnissaannik atorneqartarnissaannillu.

”Pitsaanerusumik pilersaaruteqarsinnaanngortariaqarpugut sanaartornermut aningaasat atugassagut killeqareeqisut pilersaarusiussallugit, taamaasillutik sanaartornermik suliaqartut pitsaanerusumik pilersaarusiornissaminnut periarfissaqarniassammata, taamaasilluta ukiumiit ukiumut sanaartornermut suliassat nikerarpallaartinnginniassagatsigit” oqarpoq Anda Uldum, Aningaasaqarnermut Aatsitassanullu Naalakkersuisoq, erseqqissatigalugu ataatsimeersuarnerup aamma siunertarissammagu qanoq ammanerunissamik pilersitsisoqarsinnaanera ersarinnerusumillu, taamaasilluni innuttaassuseqartut pitsaanerusumik malinnaasinnaanngorniassammata, qaqugukkut aamma sumi sanaartortoqassanersoq, nutarterisoqassanersoq imaluunniit aserfallatsaaliisoqassanersoq.

Ataatsimeersuarnerup ammaanersiorneqarnerani Aningaasaqarnermut Aatsitassanullu Naalakkersuisup eqqaavaa siunissami sanaartornermut pilersaarutit  assigiinngitsutigut nalilersorneqartarnissaannut eqqarsartoqartariaqartoq suliariumannittussarsiuussinerit pinnginnerini:

”Pitsaanerusumik takusinnaanngortariaqarparput qanoq sanaartornermut periuuseqartoqassanersoq imaluunniit kommunimi ataatsimi sanaartornissamut periarfissanik ammaanikkut. Nuna tamakkerlugu takornariaqarnermut periusissaq assersuutigalugu qanimut aaqqissuulluakkamik angallannerup ineriartornera peqatigalugu”.

Ataatsimeersuarnermi aamma erseqqissunik assersuusiortoqarpoq sutigut pitsaasumik  inuiaqatigiinnut kinguneqartitsisoqarsinnaanersoq illuatungeriit suleqatigiinnerisigut aningaasaqarnikkullu ataatsimut isigalugu- aamma suliniuteqartut peqatigalugit oqaloqatigiinnermi pilersaaruteqartut arlalitsigut saqqummiussaqarnerisigut.

Laust Løgstrup, Qeqqata Kommuniani aningaasaqarnermut, teknik-imut avatangiisinullu qullersaasoq assersuusiorluni eqqaavaa Qeqqata Kommuniani siunniunneqarmat nutaamik utoqqaat illuliornissaq pinnagu utoqqaat angerlarsimaffiinik amerlanerusunik sanaartornissamut aningaasaliisarnissaq – taakkulu utoqqaaat angerlarsimaffii nutaat utoqqaat illuata qanigisaani sanaartorneqarput, aamma utoqqaat ornittagarimmassuk. Pitsaaqutit ersaripput: Utoqqaat sapinngisamik sivisunerusumik namminerisaminnik  angerlarsimaffimminiissapput, aamma kommunit sipaaruteqarput utoqqaat illuliornissaagaluit akisuut sipaaruteqarfigineqarmata.

Sanaartorneq pillugu ataatsimeersuarneq ingerlariaqqiffiuvoq ataavartumik nukittorsaanertut, ingerlaavartumik Namminersorlutik Oqartussat Kommunillu ataqatigiissarneqarnerannut, qanoq iliornikkut pilersaarusiortarnissatsinnut aningaasat aningaasanut inatsimmi sanaartornissamut pilersaarutinut atugassat agguataartarnissaannut.

Inussiarnersumik inuulluaqqusillunga
Med venlig hilsen

Anda Uldum,
Aningaasaqarnermut Aatsitassanullu Naalakkersuisoq

 

Paasisaqarnerorusuttut attavigisinnaavaat Naalakkersuisumut allatsi Ejner Grønvold, mobil 586116, e-mail ejner@nanoq.gl.