Killeqarfiulersut nalilersuivigineqassapput

Aqutsiveqarfinnut killeqarfiulersut nalilersuivigineqassapput

Naalakkersuisut aqutsiveqarfinnut Upernaviup, Uummannap aamma Qeqertarsuup Tunuata killeqarfiinut nutaanik septembarip 15-ianni 2014-imi malittarisassaqartitsilerput.

Aqutsiveqarfiit  atuutereersut ilaanni qaleralittassiissutigineqartunit pisarineqartut ilanngaassutaajunnaarlutik aalisarneqarsinnaalerlutik. 

Malittarisassat nutaat atuutilermata oqallisaangaatsiarput ilaat apeqqusiisut ilumut aqutsiveqarfiit iluanni pisassiissutitaqanngitsumik qaleralinniartoqarsinnaassanersoq.

Aaqqissuussineq KNAPK-mit akuerineqanngilaq.

Karl-Kristian Krusep avannaani angalanermini maluginiarpaa KNAPK-p immikkoortortaanit aaqqissuussineq iluarisimaarneqartoq aamma SQAPK-mit.

Karl-Kristian Kruse erseqqissaavoq maannangaaq malittarisassaalersut pillugit allanngortitsiniarani, ukiup ataatsip ingerlareernerata kingorna misilittagaalersimasut pillugit paasissutissanik peqqaartinnani.

- Ukioq naatinnagu misilittagaalersut pillugit nalilersuititsissallunga pilersaaruteqarpunga, Karl-Kristian Kruse oqarpoq, erseqqissaallunilu nutaamik aaqqissuussineq torrallataanerarlugu.

- Aalisartut qaammatini marluinnarni-pingasuinnarni aaqqissuussineq nutaaq misilittagaqarfigivaat. Aalisartut aqutsiveqarfinni Uummannami aamma Upernavimmilu annerusumik misilittagaqarfiginngilaat. Qeqertarsuup Tunuani misilittagaqarfigineqalaarluni.

- Aqutsiveqarfinni pineqartuni siku aassimaleriarpat piffissarlu qaleralinniarfiulluartoq qaangiussimaleriarpat tulluassaaq nutaanik malittarisassiorsimanerput nalilersortissallugu, aqutsiveqarfiit ilaanni pisassiissutitaqanngitsumik aalisartarneq iluarineqarnersoq ajorineqarnersorluunniit naliliiffigineqassalluni, Aalisarnermut, Piniarnermut Nunalerinermullu Naalakkersuisoq oqarpoq.

Karl-Kristian Krusep avannaani angalanermini aalisartunik ataatsimeeqateqartilluni maluginiarpaa aaqqissuussineq aalisartunit iluarisimaarneqartoq.

- Takorloorpara aaqqissuussinerup iluaqutissartai sunniuteqarlualerpata, tamanna aalisartunit suli annerusumik iluarisimaarneqalissasoq. Pitsaanngequteqarpat ajoqutai pillugit aalisartut kattuffii tusarniaaffigeriarlugit tamatumunnga nalunaarut naleqqussarlugu allannguallatinneqarsinnaassaaq.

Pinngortitap illersorpai

Aalisarnermut, Piniarnermut Nunalerinermullu Naalakkersuisoq isumaqarpoq aqutsiveqarfiit ilaanni pisassiissutinit ilaangaataanngitsumik aalisartoqarsinnaanera illersorneqarsinnaasoq, qalerallit ukiup affaani pinngortitamit paarineqarlutillusooq pineqartarmata – aalisartoqarsinnaasarani.

- Aallaqqaammut aalisarfiulersut aamma tamatigorluinnaq eqalussuaqartarput, taakkua aamma ikilisarujussuaqqaarlugit aatsaat aalisartoqarsinnaalertarluni.

- Aamma qaleraleqarfik qanorluunniit aalisarfigitigigaluartoq tamatigut  killinganiittarpoq imartaq annerusumik aalisarfigineqarsinnaaneq ajortoq, naterluttoq naak qaleraleqarfissuugaluarluni.

- Tassaapput qalerallit aalisarneqaratik piujuartarfii qaleralinnillu aamma allanit aggersunit pilersorneqartuarfii, aalisakkat uninngasuunnginnamik.

- Taamaattumik oqaannartoqarsinnaanngilaq piujuaannartitsineq tunngaviginagu aalisortoqalersoq, Karl-Kristian Kruse erseqqissaavoq.

Pinngortitaleriffik aamma MSC

Naalakkersuisuni ilaasortaq isumaqarpoq Pinngortitaleriffiup misissuisarneri amerlineqartariaqartut, sineriammilu aalisartut qanimut peqatigilluartariaqaraat aalisaatillu naleqquttut aamma atorneqarneqartariaqartut.

- Sumiiffiit aalisarfigineqarneq ajortut qanoq aalisagaqartigineri Pinngortitaleriffimmit misissuiffigineqarneq ajorput. Imartarujussuaqarpugut, sineriappullu 44.000 kilometerinik isorartutigivoq.  Imartat aalisakkanit  pilersorneqartut qanoq ilillutik pilersorneqarneri maannamut annerusumik suli ilisimaneqanngillat, Karl-Kristian Kruse oqarpoq.

-  Pinngortitaleriffik imartatta pisuussutaanik tamakkiisumik maannamut suli misissuisimanngimmat annerusumik tapersersorneqartariaqarpoq. Soorlumi aamma Naalakkersuisooqatigiinnissamut isumaqatigiissummi tamanna allassimasoq, soorlu ima allassimasoqartoq: Imartatta aalisagaqassusia paasiniarluarneqarsinnaaqqullugu Pinngortitaleriffimmut aningaasaliissutit amerlineqassapput, amerlineqarneranut atatillugu piumasarineqassaaq aalisarnermik inuussutissarsiuteqartut misissuisarnerni suleqatigineqassasut, Naalakkersuisuni ilaasortaq oqarpoq.

Raajat nipisallu MSC-mik maannakkut nalunaaqutaqarput. Sustainable Fisheries Greenland, SFG, nunatsinni MSC-mik nalunaaqutsiinissamik suliniuteqartut maannakkut pilersaarutigaat MSC-mik nalunaaqutserneqartussat tullii tassaassasut qalerallit.

Karl-Kristian Kruse isumaqarpoq qaleralinnut ilisimatuussutsikkut maannakkut misissuinerit tamakkiinerusariaqartut qaleralik MSC-mik nalunaaqutsertinnagu.

Qaleralik avannaanit kujammut maannakkut siaruaakkaluttuinnarpoq,  aqutsiveqarfinni Upernavik, Uummannaq aamma Qeqertarsuup Tunua kisimik qaleralinniarfigineqaratik. Narsap, Paamiut, Nuup aamma Maniitsup eqqaani qaleralinniartoqarluni.

- Taamaattumik isumaqarpunga aqutsiveqarfiit pineqartut kiisisa nalunaaqutsiiniarnermi tunngavigineqarsinnaanngitsut. Sumiiffiit allat aalisarfigineqalertut aamma tunngavigalugit nalunaaqutsiisoqartariaqassammat.

Attavigineqarsinnaavoq Jørgen Isak Olsen, pisortaq, Aalisarnermut, Piniarnermut Nunalerinermullu Naalakkersuisoqarfik. E-mail: jio@nanoq.gl