Meerartagut tamatta akisussaaffigivagut

Martha pressemoede 110613

KANUKOKA-p imak qulequtserlugu ”Meeqqanik Inuusuttuaqqanillu sumiginnaasarneq akuerineqarsinnaanngilaq” tusagassiorfinnut nalunaarutaanut Ilaqutariinnermut, Naligiissitaanermut Isumaginninnermullu Naalakkersuisoq Martha Lund Olsen ima oqaaseqarpoq:

”Meeqqanut tunngasut tamatta susassaqarfigivagut, taamaattumillu qularutiginngilluinnarpara kommunit Namminersorlutillu Oqartussat tamarmiullutik kissaatigisarigaat isumaginninnikkut sullissinermi aqutsineq pitsaasumik suleqatigiissutigissagipput. 

Qularutiginngilluinnarpara kommunit annertuumik uummaarissumillu suliniuteqartartut nunatsinni meeqqanut  inuusuttuaqqanullu sullissinerminni, suliassatullu akisussaaffik  tamarmiullutik pitsaanerpaamik isumaginiarsarisaraat. Taamaattorli piffissanngorpoq sullissinerup pitsaassusaanut naatsorsuutiginninnerput nalilersueqatigiinnissarput. Neriuutigaara tusagassiuutit meeqqat inuusuttuaqqallu atugarisaat pillugit Naalakkersuisut pingaarnersiuinerannut soqutiginninnerujussuat, naalakkersuinikkullu ernumanerput kommuunit meeqqanut inuusuttuaqqanullu sullinnerminni nukissarisaat naammannersut apeqqut pillugu, suleqatigiinnerput qaninnerulersissagaa, taamaalillutami nukittunerulluta suleqatigiilluarnerussagatta.   

KANUKOKA sap.ak. tulliani isumaginninnikkut pissutsit pillugit Ilulissani isumasioqatigiissitsissaaq, tamassanilu peqataaninni kommunini isumaginninnermut ataatsimiititaliat kommuninilu pisortat naapeqatigissallugit. Tamatumani pisimasut eqqartuiffigisinnaajumaarpagut arlaatigullu paatsoortoqarsimassappat tamakku uniffiginagit siunissaq isigalugu iliuusissanik iluaqutaasussanik pilersaarusioqatigiissaagut, taamaasiornikkullu inuiaqatigiit akornanni meeqqat inuusuttuaqqallu paaqqutarineqarnerat pitsaanerulersinniassallutigu."


Annertunerusumik paasisaqarusukkuit Naalakkersuisup allattaa Sina Møller Kristiansen mobil nr. 539371, e-mail: nimk@nanoq.gl aqqutigalugit attaveqarfigisinnaavat.