EU-lu suleqatigiinnissamik isumaqatigiissut atsiorneqartoq

Kalaallit Nunaata, Danmarkip aamma EU kommissionip suleqatigiinnissaannik tamanut nalunaarutip atsiorneqarnerani persuarsiualaarneq.

Naalakkersuisut Siulittaasuata Kim Kielsenip ullumikkut Kalaallit Nunaata, Danmarkip aamma EU kommissionip suleqatigiinnissaannik Ataatsimoorluni tamanut nalunaarut atsiorpaa.

Persuarsiualaartoqarpoq EU-p allaffeqarfissuani, Berlaymontip illorsuani Bruxellesimiittumi. Tassani kommissionip siulittaasuata Jean Claude Junckerip Naalakkersuisut Siulittaasuat Kim Kielsen aamma statsminister Helle Thorning Schmidt persuarsiualaarnissamut qaaqquai ukiorpassuarni siunissami suleqatigiinnissaminnik isumaqatigiissuteqarnertik malunnartinniarlugu.

Suleqatigiinneq Kalaallit Nunaata aningaasaqarnerminik ineriartortitsinissaanut iluaqutaassaaq Europamiut suleqatigisani qanittumik suleqatigisinnaallugit.

Suleqatigiinnermut aallaaviuvoq Kalaallit Nunaata 1985-imi Unionimit aninera, tassani Illuatungeriit isumaqatigiillutik qanittumik attaveqartarnerit ingerlaannassasut kalaallillu inuiaqatigiit nappanneqarsinnaasumik aningaasaqarnikkut ineriartortinneqarnerannut iluaqutissanngorlugit ineriartortinneqassasut.

Ataatsimoorluni tamanut nalunaarummi erseqqissarneqarpoq Naalakkersuisut aamma Danskit Naalakkersuisui naligiillutik peqataasut taamaammallu taamatut naligiinnissamik tunngaveqarluni suleqatigiinnissaq tunngavigalugu EU-mut isumaqatigiissutinut tunngavissami Kalaallit Nunaata atsioqataanissaa qulakkeerneqartoq.

Tamanut nalunaarutissaq 2014-imi ukiakkulli atsioriaannaasimagaluarpoq, kisiannili qinersinermik EU kommissionillu nutaanngorneranik pissuteqartumik ullumikkumut 19. marts 2015-imut atsiorneqarnissaa utaqqissunneqarsimalluni.

Naalakkersuisut Siulittaasuat persuarsiualaarnermi ilaatigut ima oqarpoq:

"Naammagisimaarluinnarpara Kalaallit Nunaat EU-lu isumaqatigiissutitigut attaveqarnitsinni aaqqiisinnaasimagatta taakkulu siunissami ukiorpassuarni attanneqarsinnaasumik ineriartornissatsinnut iluaqutaanissaat qulakkeersimagatsigu. Kalaallit Nunaata EU-mut naalakkersuinikkut isummersortarnerani pingaarnertut eqqarsaataajuaannarsimavoq isumatuunik kingunissaqarluartunillu isumaqatigiissuteqartarnerup qulakkeerneqarnissaa, oqaluttuarisaanitsinni pissutsinik ersersitsinerinnaanngitsunik kisiannili aammattaaq peqatigiilluta maannakkut pissutsinik siunissamut eqqarsaqatigiinnissatsinnik takutitsisunik."

Taamatuttaaq Naalakkersuisut Siulittaasuat erseqqissarpaa EU-p puisinik sanaanit tunisineq pillugu malittarisassaq naligiissarnera tamanut naammaginarnissaa.

Ataatsimoorluni tamanut nalunaarut suleqatigiissutissatsinnut peqataasunit pingasuusunit tamanit atorneqarsinnaasunut tunngaviussaaq. Tassani allassimavoq peqataasut ilaatigut aalisakkanik piujuartitsinissamik tunngaveqarluni pisortatut ingerlatsinissaq, ilinniartitaaneq, pinngortitami isumalluutit, issittumi pissutsit, inunnik isumaginninnermut tunngasut, ilisimatusarneq, ingerlareersunik allanngortiteraluni pilersitsiortorneq silallu pissusaata allanngorneri pillugit attaveqarnerminnik suleqatigiinnerminnillu ingerlatseqqinnissaq suleqatigiinnissarlu nukittorsaaqqinnissarlu pillugit siunnerfimminnik nalunaaruteqartut.

Tamanut nalunaarummi immikkut ittunik aningaasaqarnermut tunngatillugu pisussaaffiliisoqanngilaq tamakkumi nunasiaataasimasunik suleqateqarnermi, EU-mik suleqateqarnissamut siunnersuisoqatigiit aalajangiineranni aamma Aalisarnermut tunngatillugu suleqatigiinnissamik isumaqatigiissummi tapiliussartaanilu toqqaannartumik tunngavissinneqareermata. Tamakkununnga ilanngunneqassapput EU-mik suleqateqarnissamut siunnersuisoqatigiit aalajangiinerpaalui aatsitassasiornermilu suleqatigiinnissamik siunniunneqartut tamarmiullutik Kalaallit Nunaata, Danmarkip EU-llu akornanni EU-mik maannakkut suleqateqarnermik piviusunngortitsisut.

Assit suli amerlanerit videoliat allallu uani takukkit.

 

Annertunerusunik paasisaqarusukkuit attaveqarfigissavat Sinniisoqarfiup pisortaa Lida Skifte Lennert, +32 2 233 09 61.