Aningaasaliissuteqarnissamik EU-lu isumaqatigiissut atsioraat

Naalakkersuisut Siulittaasuata Kim Kielsen Kalaallit Nunaat sinnerlugu atsiortuuvoq, vicegeneral direktør Marcus Cornaro EU-Kommissioni sinnerlugu peqataalluni.

 

Ilinniartitaanermut tunngasunut EU-p Kalaallit Nunaannut aningaasaliissutai pillugit 2015-imut aningaasaliissuteqarnermut isumaqatigiissutit Naalakkersuisut siulittaasuata sisamanngornermi marsip 19. Bruxelles-mi atsiorpai. 2015-imut tapiissutit annerpaaffissaat 230 millioner kr.-iupput (30,7 mio. €).

Ilinniartitaanermut tunngasuni anguniagassat arlaqartut naammassineqarsimanersut ukiumoortumik tapiissutit inaarutaasumik annertussusissaannut aallaaviusarpoq. Anguniakkat, EU Kommissionimik isumaqatigiissutaasut, ilaatigut tassaapput meeqqat atuarfianni alloriarfinni misilitsittarnerni angusaasartut pitsanngorsarnissaat, atuartut inuusuttut ilinniarfiinut ingerlariaqqittartut amerlanerulissasut kiisalu ingerlariaqqinnissamut ilinniartut naammassisartut amerlanerulissasut. Anguniakkatut isumaqatigiissutaasut Naalakkersuisut Ilinniartitaanermut pilersaarutaanni ll-mi suliniutit aqqutigalugit anguneqassapput.

Aningaasaliissuteqarnissamik isumaqatigiissut suleqatigiinnissamik isumaqatigiissutip Naalakkersuisuni siulittaasuugallarsimasumit Kim Kielsenimit aamma EU-mi ineriartortitsinissamut kommissæriusimasumit Andris Piebalgsimit oktober 2014-imi atsiorneqartup piviusunngortinneqartussallu ilagaa. Tassani EU pisussaaffilerpoq Kalaallit Nunaata ilinniartitaanernik ineriartortitsineranut 1,6 milliarder kr. (217,8 mio. €) angullugit 2020 tungaanut tapiissuteqartarnissamut.

Ilinniartitaanermut tunngatillugu anguniakkat siuliani taaneqartut saniatigut EU-mit piumasaqaataavoq aningaasarsiornikkut aalaakkaasumik ineriartortoqassasoq aammalu pisortat aningaasaataanik aqutsineq pitsanngoriartinneqassasoq. Tamatumani ilaatigut makku pineqarput. Nioqqutissanik kiffartuussinernillu pisiortortarnerit kiisalu pisortat aningaasaataasa suli annertunerusumik paasiumasarneqarnissaat.

EU-mit tapiissutigisartagai, Kalaallit Nunaata aalisarnermut EU-mik isumaqatigiissutaa ilanngullugit, ukiumut 360 millioner kr. missaaniipput.

 

Annertunerusumik paasisaqarusukkuit Anders Fonnesbech-Wulff, oqarasuaat +299 345629 attavigisinnaavaat.