Peqquserlunnikkut akilerneqartarneq akuersaanngiilluinnarneqarneranut isummerneq

Aningaasaqarnermut Aatsitassanullu Naalakkersuisoq ersarilluinnartumik anguniagaqarpoq: siullertut suliniutigissallugu aatsitassarsiornerup iluani peqquserlunnikkut akilerneqarluni kiffartuussinerup pinngitsoorneqarnissaa suliniutigissallugu. Aatsitassanut Naalakkersuisoqarfik malittarisassanik najoqqutassianik arlalinnik suliaqarpoq, taamaasilluni Aatsitassanut Naalakkersuisoqarfimmi malittarisassanik sakkortuunik najoqqutassaqarnissaq anguneqassammat tamatumunngalu attuumassuteqartunut peqquserlunnikkut akilerneqartarneq pinaveersaartissinnaajumallugu. Najoqqutassiat Transparency Greenlandimut tusarniaassutigineqarnikuupput.

”Kissaatigaara sapinngisamik ammasumik ersarittumillu Aatsitassiornermut Naalakkersuisoqarfimmi sulisoqarnissaa, taama oqarpoq Anda Uldum, Aningaasaqarnermut Aatsitassanullu Naalakkersuisoq nangillunilu:

”Tamanut pingaaruteqartorujussuuvoq innuttaasut sullitat pisortallu suliassap ingerlanneqarnerani Naalakkersuisoqarfimmut tatiginnissinnaanerat”.

Qulaani taaneqartoq anguneqarnissaa qulakkeerumallugu, Naalakkersuisoqarfiup sulisui ilinniartinneqarlutillu ajoqersorneqassapput, qanoq qanorlu iliornikkut unammillernarsinnaasut akiorneqarsinnaanissaat aatsitassarsiornermut suliaqarnermi attuumassuteqartunut.

Erseqqissaatigineqassaaq, qujanartumik suliassaqanngilaq Naalakkersuisoqarfimmi sulisut akornanni peqquserlullutik akilerneqarsimasunik unnerluutigineqarsimasunik, kisianni aatsitassanik piiaaffiit suliffiit suliffinnit allanit naleqqiullugu peqquserlunnikkut akilerneqarluni annerusumik naapitassaasoq.

”Taamaammat aamma pingaaruteqarpoq maanna qanoq iliuuseqarnikkut pinaveersaartissallugu taamatut nalaattakkat pinaveersaartikkumallugit aatsitassarsiorniarlutik suliartortussat nunatsinnut tikittalernissaannut,  Anda Uldum ilanngussivoq.

Piffissaq sivisunerusoq eqqarsaatigalugu Namminersorlutik Oqartussat suliaqassaaq tamanut atuuttussamik peqquserlulluni akilerneqartarnermut pinaveersartitsineq anguniarlugu qitiusumik allaffeqarfimmut tamanut atuuttussamik malittarisassiornikkut. Qanittukkut peqquserlulluni akilerneqartarnermut pinaveersaartitsinermut isummerneq saqqummiunneqartoq Aatsitassarsiornermut Naalakkersuisoqarfimmut attuumassuteqartunut sulisuinullu atuutinneqarpoq. 

Paasisaqarnerorusukkuit inussiarnersumik attavigiuk:

Naalakkersuisumut allatsi Ejner Grønvold: Oqarasuaat.:+299 345 212

Naalakkersuisoqarfimmi pisortaanerugallartoq Jørgen T. Hammeken-Holm: Oqarasuaat.: +299 346 846