Meeqqat sumiginnakkat pillugit suliniuteqarnermi politikkikkut suleqatigiinneq

Isumaginninnermut Naalakkersuisup Martha Lund Olsen-ip sukumiisumik suliniutiginiarsimavaa meeqqat inuusuttuaqqallu sumiginnarneqarsimasut pillugit 2015-mut Aningaasanut Inatsit aqqutigalugu immikkut aningaasaliisoqarnissaa. Taamaattumik Martha Lund Olsen-ip nuannaarutigivaa ullumi 16. marts immikkut 8,6 mio.kr.-ninik suliniuteqarnermut aningaasaliisoqarnissaa aalajangiiffigineqarsimammat.

 

”Assorsuaq nuannaraara politikkikkut soqutigisaqarfiit akimorlugit meeqqanut inuusuttuaqqanullu suliniuteqartarnerit pitsaanerulersinneqarnissaanut immikkut aningaasaliisoqarsinnaasimammat. Tamatumani Inatsisartut Ilaqutariinnermut Peqqissutsimullu taamatullu Inatsisartut Aningasaqarnermut Ataatsimiititaliaat qujaffigerusuppakka suliniutigineqartoq pillugu paasinnilluarsimanerannnik”, oqaaseqarpoq Martha Lund Olsen.

 

Martha Lund Olsen-ip aningaasaliissutit siunnersuisarfimmik nutaamik pilersitsinissamut atorusuppai. Taakkua kommunit sulianik oqimaatsuni pisariusunilu suliaqarneranni ikorfartuisassapput. Siunertarineqarporlu qulakkeerniassallugu kommunit sukkanerusumik sukumiinerusumillu pisariaqalerfiatigut iliuuseqarniartalernissaat, taamatullu suliniuteqarnerni meeqqat pisariaqartitaat pitsaanerpaamillu atugaqarnissaat qitiutillugit iliuuseqaateqartoqartassasoq.