Urani pillugu paasisitsiniaaneq 2015

Matumuuna urani pillugu paasisitsiniaallutik Naalakkersuisut Kujataani innuttaasut ataatsimiisinnissaannut sumiiffinni ullunilu makkunani innuttaasunik soqutiginnittunik qaaqqusipput:

Narsaq 23. marts, nal. 19 katersortarfimmi
Nanortalik 24. marts nal. 19 katersortarfimmi
Qaqortoq 25. marts nal. 19 katersortarfimmi
Narsarsuaq 26. marts nal. 12 Hotel Narsarsuarmi. 

Juuni 2014-mi innuttaasunik ataatsimiisitsinertulli politikkikkut peqataatitaqarani ingerlanneqassapput. Illoqarfinni tikeraarneqartuni innuttaasut uranimik misissuineq atuinerlu pillugu tusagaqartinnissaat siunertaralugu aaqqissuunneqarput. Oqalugiartussat tassaapput immikkut ilisimasaqarfimminni, geologiimi, avatangiisinik illersuinermi, aatsitassarsiornermi innuttaasunillu ilanngussuinermi ukiorpassuarni misilittagaqartutut ilisimatuut misilittagaqarluartut.

Angalanissamut tunngavissiipput Vittus Qujaukitsoq, Andreas René Uldum aamma Mala Høy Kúko, tassaasut Inuussutissarsiornermut, Suliffeqarnermut Niuernermut Nunanullu allanut Tunngasunut, aamma Aatsitassanut Aningaasaqarnermullu, kiisalu Pinngortitamut, Avatangiisinut Inatsisinillu Atuutsitsinermut Naalakkersuisuni ilaasortat.

Pisussatut ilanngussami annertumik paasissutissat takukkit.


Inussiarnersumik inuulluaqqusillunga
Med venlig hilsen 

Andreas René Uldum
Vittus Qujaukitsoq
Mala Høy Kúko