Meeqqat inuusuttuaqqallu pillugit oqaloqatigiilluartoqarpoq

Meeqqat inuusuttuaqqallu pillugit Martha Lund Olsen-ip kommunillu akornanni oqaloqatigiilluartoqarpoq

”Nuannaarutigaara Juliane Henningsenip (IA-meersup) Naalakkersuisut meeqqat inuusuttuaqaallu arlaatigut ernumanartumik inissisimasut pillugit kommuninik qanimut suleqatiginninniarnerput tapersersimammagit”, taamatut oqaaseqarpoq Naalakkersuisoq Martha Lund Olsen, Nuuk TV-p pingasunngornermi 11. marts Nutaarsiassanik aallakaatitsinerani.

Meeqqanik inuusuttuaqqanullu sinerissap ilaanni nakkutilliisarsimanerit malitsigisaannik Isumaginninnermut Naalakkersuisoq suli sukumiinerusumik suliniuteqalersimavoq, tassami nakkutilliiartorluni angalanerit takutissimammassuk suliassarpaaluit naamaginartumik kivinneqartarsimannginnerat aaqqiiviginiarneqartariaqartoq. Tamatumani Naalakkersuisup anguniarpaa kommunit suleqatigalugit aaqqiissutissanik nassaarniaqatigiittarnissaq. Tassunga tunngatillugu Martha Lund Olsen-ip oqaatigivaa kommunini isumaginninnikkut siulittaasut ukiumut 3-4 –arlugit naapeqatigisarlugit.

Ilaqutariinnut Peqqissutsimullu ataatsimiititaliamut iliuuseqaatissat pillugit nalunaaruteqarnermini Martha Lund Olsen-ip saqqummiuppaa, qitiusumik siunnersuisarfimmik pilersitsilersaarluni taakkulu kommunit meeqqanut inuusuttuaqqanillu ulluinnarni sullissineranni ikorfartuillutillu suliassat naapertuuttumik kivinneqartarnissaat suleqataaffigisarumaaraat.

”Kommunini meeqqanut inuusuttuaqqanullu tunngasuni sullissisuusut nalinginnaasumik suliassarpassuarnik ilaatigullu sukumiisorujussuarnik suliakkersorneqartarput. Soorunalimi imaasiinnarluta suli amerlanerusunik atorfinittitsisarnikkut suliassat kivitsinniarsinnaanngilagut, amerlasuutigummi inuttassarsiortoqaraangat atorfimmut qinnuteqartut ikittuararsuusarmata. Tamanna tunngavigalugu qitiusumik ulluinnarni ikorfartuisarsinnaasunik siunnersorteqarfiliorniarpugut, taakkuli suliassani sukumiisuni ikiuuttarnermikkut kommunini suliassanik ikilisaaqataasinnaasassapput”, taamatut oqaaseqarpoq Naalakkersuisoq Martha Lund Olsen.