Aatsitassarsiorfiit aaliangersimanerusumik aatsitassarsiornermut isummernissaq ujartorpaat

Aaliangersimanerusumik ataavartumillu aatsitassarsiornermut politikeqarneq pisariaqalerpoq  Fraser-ip allattorsimasuuffianit normu 41-mi inissisimanerput aaqqissagutsigu – taanna allattorsimaffik tassaavoq Canadami suliffeqarfik misissueqqissaartartoq nunat sorliit aatsitassarsiorfiit aningaasaleerusuttullu aningaasaatiminnik aningaasaleerusunnerannik naatsorsuisartoq.

Misissuinermi immikkoortortani qulequtaaqqat ataasiakkaat qiviaraanni takuneqarsinnaavoq ukunani tunuariaateqarsimasugut: akileraaruteqartarnikkut, angallannikkut, piginnaasaqarnikkut kiisalu nunap sananeqaatitigut orniginartuunera. Siulleq pineqartoq pissuteqarsorineqarpoq, ukiut arlallit matuma siorna royalty (piiaaffiup attartorneranut akiliut) eqqunneqarmat aatsitassanik piiaanissamut pilersaarutaasunut aningaasatigut sunniuteqarmat. Aatsitassarsiorfiit aningaasaqarnikkut allannguutinut sunnertiasuararsuupput (assersuutigalugu akileraarnikkut- aamma piiaaffiusup attartorneranut akiliutaasut piumasaqaatit), aatsitassarsiornermut pilersaarutit ukiut qulikkaani arlalinni sivisussuseqarsinnaasarmata.

Taamaattumik suliffeqarfissuit maluginiartartorujussuaat aatsitassarsiornermut pilersaarutinut aningaasaliinnginnerminni, nuna pineqartoq aatsitassarsiornermut aaliangersimasumik isummersimanersut piffissami sivisulaartumi. Tassunga atatillugu aatsitassarsiornermut inatsisip sukaternissaanut sillimasariaqarpugut, aatsitassarsiornermut pilersaarutaasunut artukkiinaveersaassalluta.

Immikkoortut pineqartut pingasut sinneruttunut  tunngatillugu immikkuullarissumik nassuiaatissartaqanngilaq Fraser-ip kingullermik saqqummiunneqarmat pissutsit piviusut tunngavigalugit allanngortoqarsimanngimmat. Kisianni qanorluunniit ikkaluarpat suliffeqarfissuit aningaasaleerusuttullu oqaloqatiginerisigut misissorniarparput suna tunngavigalugu allannguisimanersut.

Pingaaruteqarluarmammi Naalakkersuisut qulakkiissallugu nunani tamalaani aatsitassarsiornermik suliaqartut aningaasaliiniartullu Kalaallit Nunaat aatsitassarsiorfittut orniginartutut qulakkeernissaa. Periusissallu ilagissavaat: qulakkiissallugu aaliangersimasumik aatsitassanut isummersimanissaq.

 

Anda Uldum, Aatsitassarsiornermut Naalakkersuisoq, Demokraatit - mit