Avaleraasartuut misissuiffigineqarnerussapput

Naalakkersuisut Tunumi Kitaatalu Kujataani avaleraasartuunik misissuisitsinerat sakkortusineqarpoq. Taamaaliortoqarnerani biologit misissuinissaannut 2015-imi 6,2 mio. kr.-init aningaasaliissutitut immikkoortinneqarput.

Silap pissusaata avatangiisillu allanngornerisa kinguneraat kalaallit imartaanni avaleraasartooqarnerulernera. Biologit misissuinerat Pinngortitaleriffimmiit ingerlanneqartoq avaleraasartuut qanoq siammartigisimanerannut, qanorlu amerlatiginerannut pingaaruteqartunik ilisimasaqalersitsisussaavoq. Misissuinermi angusarineqartut avaleraasartoorniarnermi paasissutissat peqatigalugit avaleraasartuut pillugit naalagaaffiit sineriallit siunissami isumaqatigiissuteqarnissaanni piareersarnissamut pingaaruteqartussaapput. Avaleraasartuut Kalaallit Nunaata imartaani qanoq siammartigisimanerannut ilisimatusarnikkut uppernarsaatit saqqummiunnerisigut Kalaallit Nunaata inissisimanera nukittunerulersussaavoq.

”Nuannaarutigeqaara Kalaallit Nunaanni avaleraasartuut pillugit ilisimasatta amerlanerulernissaannut massakkut amerlanernik aningaasassaqaleratta. Inuussutissarsiutigalugu aalisarnerup, taamaalillunilu kalaallit aningaasaqarnerisa nukittunerulernissaannut ilisimasaq tamanna atortussaavarput. Suliniutit taamaattorpiaat kalaallini inuiaqatigiinni ineriartornerup siuarsarnissaanut iluaqutaasussaapput”, Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko oqarpoq.

2014-imi Tunumi avaleraasartuut 78.670 tons-it aalisarneqarput. Taamaalilluni avaleraasartoorniarneq amerlassutsit eqqarsaatigalugit Kalaallit Nunaanni annertunerpaanngorpoq. Avaleraasartoorniarneq Atlantikup Avannaani sumiiffinni tamani pisarpoq, ukiumullu 1 million tonsit sinnerlugit ataatsimut pisarineqartarlutik. Kalaallit Nunaat avaleraasartoorniartarnermi naalagaaffittut sinerialittut nutaatut biologit misissuineri aallaavigalugit naliliisoqarneratigut naatsorsuisoqarneratigullu pisassaminik piumasaqartussaavoq, biologillu misissuineranni pisarineqartut aqqutigalugit peqassuseq, qanorlu siammartigisimanerat kiisalu paasissutissat aalisartuneersut aallaavigalugit paasineqartussaapput.

”Pisuussutinik imartatsinniittunik atuilluarnissarput inuiaqatigiinni pisariaqarteqaarput. 2015-imi avaleraasartoorniarnissaq malinnaaffigissallugu qilanaaraara, avaleraasartooqassutsillu misissuiffigineqarnerani angusarineqartut tusarfigissallugit qilanaaralugit. Ukioq manna avaleraasartooqassutsip misissuiffiginerani uppernarsaatissat pissarsiarineqartussat pingaaruteqartorujussuupput”, Aalisarnermut, Piniarnermut Nunalerinermullu Naalakkersuisoq Karl-Kristian Kruse oqarpoq.

Nassiussisoq: Pinngortitamut, Avatangiisinut Inatsisinillu Atuutsitsinermut Naalakkersuisoq Mala Høy Kúko aamma Aalisarnermut, Piniarnermut Nunalerinermullu  Naalakkersuisoq Karl-Kristian Kruse

Attaveqarfissaq Pinngortitamut, Avatangiisinut Inatsisinillu Atuutsitsinermut Naalakkersuisoqarfiup: Immikoortortaqarfiani pisortaagallartoq Pernille Møller, pmoe@nanoq.gl , Oqarasuaat: 34 51 54

Aalisarnermut, Piniarnermut Nunalerinermullu Naalakkersuisoqarfimmi attaveqarfissaq: Allaffimmi pisortaq Jóhanna Lava Køtlum, jool@nanoq.gl , Oqarasuaat 34 53 53