Kalaallit Nunaat angusivoq

Inuiaqatigiinni arnat pisinnaatitaaffiinik soraarummeerluni misilitsinnermi Kalaallit Nunaat angusivoq

FN-ip arnanik sutigut tamatigut immikkoortitsinerit atorunnaarsinnissaat pillugu isumaqatigiissutaa (CEDAW) pillugu Danmark, Kalaallit Nunaat Savalimmiullu ulloq 24. februar soraarummeerlutik misilitsipput, tamanna pivoq Schweizimiittumi Genèvemi FN-ip qitiusumik Europap allaffeqarfiani.

Misilitsilluni soraarummeernermi aallaaviuvoq nalunaarusiaq suliaqarfiusumi sammisanik, kisitsisitigut paasissutissanik, inatsisinik il. il. saqqummiussaqartassasoq aamma 2009-mi kingullermik misilitsilluni soraarummeertoqarmalli arnat pisinnaatitaaffiinik, soorlu suliffeqarnermut ilinniagaqarnermullu tunngatillugit qanoq iliuuseqartoqarsimaneranik nassuiaasoqartoq.

CEDAW-p ataatsimiititaliaata nalunaarusiaq aamma misilitsilluni soraarummeernermi ataatsimiititaliap Kalaallit Nunaannut apeqqutaanut akissutit aallaavigalugit inaarutaasumik oqaaseqaateqarnikkut Kalaallit Nunaat ”karakteerilerpaa”. Inaarutaasumik oqaaseqaatit aamma ilagaat inuiaqatigiinni arnat inissisimanerannik pitsanngorsaataasinnaasunik Kalaallit Nunaata qanoq iliuuseqaqqissinnaaneranut inassuteqaatit arlallit.

Kalaallit Nunaat nersualaarneqarpoq, sulili iliuuseqaqqissinnaavoq

Ataatsimiititaliap Kalaallit Nunaat nersualaarpaa, naligiissitaanermut inatsit nutaaq suiaaqatigiinnik assigiinngissitsinermik  inerteqquteqartoq aamma politikkikkut aaqqissuussaanermi, inuussutissarsiuteqarnermi allatigullu inuiaqatigiinni, taakkununnga ilanngullugit ilinniartitaanermi suliffeqarnermilu arnanik ilaatitsilluartoq 2013-imi atuuttussanngortillugu akuersissutigimmagu. Ataatsimiititalialli aamma inassutigaa naartuersittarnerpassuit iliuuseqarfigineqarnerusariaqartut, soorlu arnannut persuttaasarneq iliuuseqarfigineqarnerusariaqartuttut oqaatigineqartoq.

”Nipangersimanata - Annersaaneq unitsilli – 2014-2017-imut persuttaasarneq akiorniarlugu periusissatut iliuusissatullu pilersaarut”,  ilaatigut arnannut persuttaasarnerup iliuuseqarfiginissaanik siunertaqartoq Naalakkersuisut 2014-imi akuersissutigat.

Naalakkersuisut nittartagaanni atuarneqarsinnaapput ataatsimiititaliap inaarutaasumik oqaaseqaatai kiisalu CEDAW-mut tunngatillugu allagaatit.

Kalaallit Nunaata nalunaarusiani tulleq marts 2019-imi tunniutissavaa, ukiulli marluk qaangiuppata killiffik pillugu nalunaarusiaq ataatsimiititaliamut tunniutissallugu. Kalaallit Nunaannit nalunaarusiaq danskit Naalagaaffeqatigiinnermut tunngatillugu nalunaarusiaannut tamarmiusumut ilanngunneqarpoq.

Paasisaqarnerorusukkuit attavigiuk Kirsten Olesen, oqarasuaat 55 32 52 imaluunniit Niels Thomas Andersen, oqarasuaat 34 53 39.