Nunani avannarlerni ministerit Ilulissani ataatsimiinnerat

Nunani avannarlerni suleqatigiinnermut ministerit Ilulissani 10.-11. marts ataatsimiissapput nunat avannarliit issittumi apeqqutit pillugit suleqatigiinnerat oqaluuserissallugu.

Ukioq manna Danmark Nunani Avannarlerni Ministerit Siunnersuisooqa-tigiivini siulittaasuutitaqarpoq aammalu Kalaallit Nunaat Savalimmiullu suliassanut ilanngussaqarsimapput. Danmarkip sammisassatut toqqarsimavai Ineriartorneq, Atugarissaarneq aammalu Naleqartitat. Atlantikup avannaaneersut Kalaallillu Nunaat ”Issittoq Tungujortoq”-mik ilanngussaqarput, tamatumani suliniutit Issittumut attuumassutillit ingerlanneqassallutik.

Ministerit siunnersuisooqatigiivi amerlasuut ukiut ingerlaneranni Kalaallit Nunaata peqataanera tunngavigalugu suliatigut oqartussaaffigisamik ataasiakkat iluanni issittumi apeqqutinik aaqqitassanik suliaqartarsimapput. Matumani pineqarput assersuutigalugu kultureqarneq, ilinniartitaaneq & ilisimatusarneq, avatangiisit, inuutissarsiutit ineriartortinneri aamma isumaginninnermut apeqqutit attuumassutillit. Matumunnga ilanngunneqassaaq, Nunani Avannarlerni Piorsarsimassutsikkut Attaveqaat (NAPA) ukiuni amerlasuuni piusimammat, sammisaqarfinnilu marlunni annertuuni suleqataasimalluni. NAPA-p ilaatigut nunat avannarliit kulturiat Kalaallit Nunaanni issittumilu sumiiffinni allani saqqumilaarnerulersissimavaa, ilaatigullu Kalaallit Nunaat kalaallillu kulturiat Nunani Avannarlerni allani saqqumilaarnerulersissimallugu.

Naalakkersuisut tungaannit aamma ministerit ataatsimiinnissaat tamanna atorniarparput nunat avannarliit suleqatigiinnerat Kalaallit Nunaanni annertunerusumik ilisimaneqalernissaa siunertaralugu. Kalaallit Nunaanni ingerlanneqartunut ataatsimiinnernut allanut arfineq marlunut atatillugu innuttaasut aammattaaq nunat avannarliit suleqatigiinnerat pillugu suli annertunerusumik tusagaqarnissaminnut periarfissaqassapput.

”Uannit isigalugu Nunat avannarliit suleqatigiinnerat pingaaruteqartumik  Naalakkersuisut nunanut allanut politikkikkut suleqateqarnerannut ilaavoq aammalu tamanna naalakkersuisooqatigiinnitsinnut tunngaviusumut assingulluinnarpoq, soorlu tamanna Nunani avannarlerni sanilitsinnik suleqateqarnitta pingaaruteqarnera erseqqissarsimagipput” Nunanut Allanut Suleqateqarnermut Naalakkersuisuugallartoq Vittus Qujaukitsoq oqarpoq.

”Suleqatigiinnermut ministerit ataatsimiinnerisa ilaatigut nunani avannarlerni suleqatikka periarfississavai, nunarsuaq tamakkerlugu kiatsikkiartornerup nalaani issittormiut inuiaqatigiit qanoq ineriartornersut nammineerlutik takusinnaalissallugu, aammalu tamanna ilutigalugu ataatsimiinneq periarfissiissaaq, ataatsimoorluta oqaluuserisinnaalissallugu, susassaqarfiit sorliit suliniuteqarfigissanerlugit Issittumi sulinermut atatillugu. Nunanili avannarlerni ministerit Siunnersuisooqatigiivini ataatsimoorussatsinnik isumalluutissaqarpugut, avannaamioqatigiilluta isumaqatigiissutigisinnaasatsinnik, susassaqarfinnut taakkunorpiaq siuarsaanissamut atorsinnaasatsinnik”, Vittus Qujaukitsoq naggasiivoq.

 

Annertunerusumik paasisaqarusukkuit:

Naja Lund Aparico

Telefon: +299 345157

Mail: najl@nanoq.gl