Kalaallit inuusuttut sakkutooqarneq nukittorsarsinnaavaat

Kalaallit inussuttut arnat angutillu amerlanerit sakkutuunngorniarsinnaaqqullugit Illersornissamut Qullersaqarfik sakkutuunngortussarsiorluni paasisitsiniaanernik annertuunik ingerlataqarpoq.

Kalaallit inuusuttut arnat angutillu 17-it 26-illu akornanni ukiullit amerlanersut sakkutuungorniarsinnaannissaat siunertaralugu Kalaallit Nunaanni tusagassiutit aqqutigalugit paasitsiniaaneq ullumi aallartinneqarpoq. Sakkutuunngorniarsinnaanissamut suliniut aqqutigalugu Kalaallit Nunaanni paasisitsiniaanerit sakkutuunngorniartitsiniarnerillu majimi junimilu Illersornissamut Qullersaqarfimmit ingerlanneqassapput.

- Upernaap ingerlanerani  Sakkutuut Ulluat Danmarkimi ingerlanneqartartup ilaa Kalaallit Nunaanni ingerlatissavarput. Kalaallit inuusuttut sakkutuunngorniarnissartik soqutigigunikku tamannalu ilisimasaqarfiginerusullugu Danmarkiliaqqaartariaqanngillat. Illersornissamut Qullersaqarfiup kalaallit inuusuttut nammineerlutik ornissavai – neriuutigaaralu sakkutuutut tassanilu atorfeqarnissamut ilinniarnissamullu periarfissarpassuit pissanganartut paasisaqarfiginissaanut amerlasuut periarfissinneqassasut taamak oqarpoq illersornissamut ministeri Nicolai Wammen.

Nicolai Wammen naapertorlugu kalaallit inuusuttut amerlanerusut sakkutuunngortarnissaat siunertaavoq  ajunngitsoq pingaartumik naalagaaffiup avannarpasissortaani sakkutuut suliassat eqqarsaatigalugit:

- Kalaallit inuusuttut amerlanerusut sakkutuunngorniartarnissaat neriuutigaara. Pingaartumik Kalaallit Nunaanni, Atlantikup avannaanni issittumilu sakkutuutut suliassat pingaarutillit eqqarsaatigalugit. 

Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq Vittus Qujaukitsoq tassunga tunngatillugu oqarpoq:

- Illersornissamut Qullersaqarfiup Kalaallit Nunaanni taamatut suliniuteqarniarnera nuannaarutigaara. Inuussuttut amerlanerusut Kalaallit Nunaanni sakkutuutut sulinissamut kajumissuseqalersinniarlugit aammalu kalaallit amerlanerusut sakkutuutut atorfeqalersinnaanissaat eqqarsaatigalugit Illersornissamut Qullersaqarfiup paasisitsiniaasarnerisa sakkutuunngortitsiniaasarnerisalu pitsanngorsarneqarnissaanik suliniut nutaaq danskit kalaallillu naalakkersuisuisa ataatsikkut suliaasa ilagaat. Suliniut ilassilluarpara neriuutigalugulu kalaallit inuusuttut neqeroorut atorluassagaat.

2015-imi 26. majimit 10. junimut Illersornissamut Qullersaqarfik Namminersorlutik Oqartussat suleqatigalugit Kalallit Nunaanni illoqarfinni anginerusuni immikkut toqqarneqarsimasuni arfineq marlunni inuusuttorpassuaqarfiusunilu Sakkutuut Ulluanik taallugu paasisitsiniaanernik ingerlatsisarniarput. Paasisitsiniaanerni taakkunani illersornissamut Qullersaqarfik illoqarfinni pineqartuni timersortarfinnik eqaarsaartarfinnilluunniit attartortassaaq taakkunanilu Illersornissamut tunngatillugu Issittumi suliaasartut, sakkutuunngorniarfinni ilinniarneqarsinnaasut aammalu sakkutuuni atorfeqarnissamut periarfissat paasisitsiniutigineqassapput. Kalaallit inuusuttut angutit arnallu oqaatsitigut timikkullu piginnaasaattaaq misiligarneqartassapput. Kalaallit Nunaanni Sakkutuut Paasisitsiniaallutik Ullorititaat nammineq kajumissuseq aallaavigalugu peqataaffigineqartarpoq.

Taamatut aaqqissuussinerit 2016 aamma 2017-imi ingerlateqqinneqarsinnaanissaat siunertaavoq. Aaqqissuussinerit ataasiakkaat ingerlanneqareeraangata nalilersuisoqartassaaq, tassani suliaq naammassisaq taamasumalu sunniutai nalilersoqqissaarneqartassallutik.

Inuusuttut peqataaffigisaanik ataasinngornermi 1 juni nal. 12.00 Nuummi Timersortarfissuarmi Sakkutuut Paasisitsiniaallutik Nuummi ulloqartitsinerannut atatillugu tusagassiortunik katersortitsisoqassaaq Namminersorlutik Oqartussat, kommunit., Peiareersarfiit, Illersornissamut Ministeriaqarfimmit Arktisk Kommandomillu peqataaffigineqartumik.

Paasisitsiniaalluni sakkutuunngortitsiniarlunilu suluniut tamarmiusoq illersornissamut Ministeriaqarfiup issittumi suliarisartakkaminik namminersorlutik Oqartussat, kommunit najukkanilu piareersarfiit peqatigalugit nalilersuinerata ilaattut ingerlanneqassaaq.

Sakkutuut Kalaallit Nunaanni paasisitsiniaallutik ulloqartitsineri 2015-imi illoqarfinni ukunani ingerlanneqassapput:

Qaqortoq: 26. maj
Tasiilaq: 28. maj
Nuuk: 1. aamma 2. juni
Sisimiut: 4. juni
Aasiaat: 6. juni
Ilulissat: 8. juni
Upernavik: 10. juni

 

Paasissutissat annertunerusut www.naalakkersuisut.gl imalluunniit Illersornissamut Ministeriaqarfiup tusagassiisarnermut piareersimatitaa 2323 6500 attavigineqarsinnaapput.