Kruse: Aasiaat sikuummat pisuussutigisinnaanngilara

Sermitsiaq, nr. 08, februaarip 20-anni 2015-imi allappoq aasiammiut ugguarnerarlugit Aasiaat pisarnermisut sikujaarnerummat, sikooqimmat raajarniarneq ajorsilluinnarluni. Aasianni Polar Raajami sulisartut 100-it ullormiit ullormut soraarsinneqarneri imaannaanngitsuunerarlugu allalluni. 

Aviisimilu aamma atuarneqarsinnaavoq Aasianni inuussutissarsiornermut siunnersuisooqatigiit uggorigaat Aalisarnermut, Piniarnermut Nunalerinermullu Naalakkersuisoq Aasiannut tikeraarsinnaanngimmat.  

Aamma Inatsisartuni ilaasortap Ane Hansenip tupigusuutigilluinnarpaa Naalakkersuisuni ilaasortap Aasianni Inuussutissarsiornermut Siunnersuisooqatigiit aggersaanerannut akuersaarsimanngimmat. 

- Erseqqissaatigerusuppara Aasiaat eqqaata sikuuneranut pisuutinneqassannginnama, tamannami piliarinngilara,  sulisullu Polar Raajami sulisut 100-it aamma uanga soraarsitarinagit,  Karl-Kristian Kruse erseqqissaavoq. 

- Aamma pinngitsoornanga oqaatigerusuppara fabrikkimut qanoq amerlatigisunik tulaassisoqarnissaanik aaqqissuussisuuneq ajorama. Erseqqissaqqikkusupparalu Aasianni suliffissaaleqititsiniarlunga suliniuteqannginnama, Karl-Kristian Kruse oqarpoq, uggoreqalugulu sulisut taama amerlatigisut soraarsinneqarsimammata. 

Aggersaasorpassuit 

- Miserratiginagu oqaatigissavara ataatsimiinnissanut assigisaanullu peqataanissannut qaaqqusissuterpassuarnik tigusaqartarama. Suliassama allattoqarfimmalu suliassaasa pingaartumik angalasarnissat eqqarsaatigalugit qanoq agguataarneqarsinnaaneri aamma uanga pingaartillugit suliassama suussaneri akisussaaffimmik tigusigamali eqqarsaatersorfigisimavakka, Karl-Kristian Kruse oqarpoq. 

Naalakkersuisuni ilaasortap erseqqissarpaa politikerit allat amerlasuut assigalugit nuna aggerfigisaminik pingaartitsinerunissani kissaatiginagu. 

- Aasianni Inuussutissarsiornermut Siunnersuisoqatigiit akissuteqarfigereerpakka ilisimatillugit aggersinnaananga, ilisimatillugilli piffissami allami Aasiannut tikikkuma ataatsimeeqatiginissaanut aggersarumaarlugit, Karl-Kristian Kruse oqarpoq. 

Raajartassat ikilipput 

Raajartassat ikilinerisigut suliffissuit raajanik tunisassiassanik pilersorneqarnerisa eqqorneqarsinnaanerat Naalakkersuisut arajutsimanngilaat. 

- Tassunga tunngatillugu Aalisarnermut, Piniarnermut Nunalerinermullu Naalakkersuisoqarfiup aalisarnermik inuussutissarsiuteqartut qanimut suleqatigalugit ulluni makkunani sulissutigaa nunat allamiut raajartassaasa EU-mit amerlineqarnissaat, soorlu canadamiut raajartassaat Kalaallit Nunaanni tulaanneqarlutillu tunisassiarineqarsinnaanissaat, Karl-Kristian Kruse oqarpoq. 


Paasisaqarnerorusuttut attavigisinnaavaat: Judith Kûitse Nielsen Aalisarnermut, Piniarnermut Nunalerinermullu Naalakkersuisumut Karl-Kristian Krusemut allatsi, oqarasuaat +299 53 06 27 imaluunniit e-mail jukn@nanoq.gl.