Imigassaq Ikiaroornartorlu pillugit Siunnersuisooqatigiit nutaamik siulittaasoqalerput

Imigassaq Ikiaroornartorlu pillugit siunnersuisooqatigiit inissititserlutik ataasimiinneranni Nivé Heilmann kingoraarlugu Britta Nielsen Johansen siulittaasussatut toqqarneqarpoq. Uju Petersen siulittaasup tulliatut ingerlaqqippoq.

Siunnersuisooqatigiit aanngajaarniutinut aningaasanoorajunnermullu tunngasunik pinaveersaartitsinermut-, peqqissuunissamik suliniuteqarnermut-, nakkutilliinermut - nakorsaanermullu atatillugu siunnersuisartuupput. Siunnersuisooqatigiit Naalakkersuisunut Naalakkersuisoqarfinnullu attuumassuteqartunut siunnersuisartuupput.

- ”Imigassaq Ikiaroornartorlu pillugit Siunnersuisooqatigiinnik qanimut pitsaasumillu suleqateqarnissara qilanaaraara. Aanngajaarniutinik atornerluineq aningaasanoorajunnerlu, innuttaasut peqqissuunissaat anguniarlugu suliniummi Inuuneritta II-mi suliniutaasussani pingaarnersiukkat ilagaat. Atornerluineq; meeqqat, inuusuttut ilaqutariillu ajornartorsiutaasa ilarpassuinut patsisaavoq. Atornerluinermut tunngatillugu unammilligassat anigorniarnissaat pisortaqarfiit akornanni ataqatigiissaarinissamik piumasaqaatitaqarpoq. Siunnersuisooqatigiit ilinniakkat- Naalakkersuisoqarfiillu akimorlugit katitigaanerat, ataatsimoorluni ajornartorsiutinik aniguiniarnissamut periarfissiivoq.” taama oqarpoq Peqqissutsimut Naalakkersuisoq Martha Lund Olsen.

”Imigassaq Ikiaroornartorlu pillugit Siunnersuisooqatigiinnut uteqqinnera nuannaarutigeqaara. Siunnersuisooqatigiinni ilaasortat allat Naalakkersuisullu Martha Lund Olsen-ip suleqatigilernissaat qilanaaraara”, siulittaasunngorlaaq Britta Nielsen Johansen taama oqarpoq imalu nangilluni:

-”Imigassamik atuineq ukiut ingerlanerini annikillisimagaluaq sulilu annikilliartoraluaq, politiit kisitsisaataat naapertorlugit nakuusertoqartarnerata nalinginnaanera, unammilligassatut isigaara. Annertuumik suliassaqarnera najukkani eqqartuussivinni suliat amerlassusaasa takutippaat. Pinerlunnerit amerlanersaat -nakuusernerit ilanngullugit- imigassartorsimatilluni pinerluutaasarput, pingaartumillu meeqqat inuusuttullu sumiginnagaasarlutik. Nunatsinni meerartagut inuusuttagullu aanngajaarniutinit- soorlu imigassamit hash-imillu- pingaarnerutissavagut.”

Siunnersuisooqatigiinni ilaasortat tassaapput:

Peqqissutsimut Naalakkersuisumit toqqarneqartut:

  • Britta Nielsen Johansen, meeqqanut inuusuttunullu tunngasunit aallartitaq
  • Helga Kristiansen, atornerluisunik katsorsaanermut tunngasunit aallartitaq
  • Uju Petersen, timersornermik tunngasunit aallartitaq
  • Christina Viskum Lytken Larsen, aningaasanoorajunnermut tunngasunit aallartitaq

Taakku saniatigut immikkoortunit assigiinngitsunit makku aallartitaapput:

  • Bjørn Tegner Bay, Kalaallit Nunaanni politiinit
  • Gunnar Persson, Ilaqutariinnermut, Naligiissitaanermut Isumaginninnermullu Naalakkersuisoqarfimmiit
  • Birgit Niclasen, Peqqissutsimut Naalakkersuisoqarfimmiit
  • Eva Kirkegaard, Kanukoka-miit
  • Else Poulsen, Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfimmiit
  • Inuttaqanngikkallartoq, Nunatsinni Nakorsaaneqarfimmiit

Paasissutissat sukumiinerusut peqqinnissaq pillugu siunnersorti Lisa Christiansen oqarasuaat: +299 34 66 50 /mail: lich@nanoq.gl aattavigalugu pissarsiarineqarsinnaapput