EU-mut tuniniaaqqusinnginnerup sukateriffiginiarneqarnera

Tunisassianik Inuit puisittaannik EU-mut tuniniaaqqusinnginnerup peqqussutaata sukateriffiginiarneqarnera

EU-p kommissionia februaarip qulingiluaanni puisinut peqqussutip allannguutissaanik siunnersuuteqarpoq, allannguuteqassalluni WTO-p 2014-imi aalajangiinera tunngavigalugu. Tamanna pillugu EU-mi kingusinnerpaamik oktobarip 18-ianni 2015-imi aalajangiisoqassaaq.

Peqqussutip inerteqqutaatippaa puisinit tunisassiat EU-mi tuniniarneqarnissaat inerteqqutaassasoq. Peqqussummi allassimasoqarpoq tunisassiat ilaatigut Kalaallit Nunaanneersut aamma Canadameersut “matumani Inuit puisinit tunisassiaat pineqanngimmata”.

Namminersornerullutik Oqartussat Danmarkimi naalakkersuisut aamma nunanut allanut ministeriaqarfik peqatigalugit siunnersuutigineqartoq maanna oqaaseqarfigereerpaat, siunnersuummut allannguutissatik nassiutereerlugit. Matumuuna oqaaseqaatit siunnersuummullu allannguutissatut siunnersuutit itisilerusunngilakka suli isumaqatiginniartoqarmat.

Naalakkersuisut piujuaannartitsineq atorluaanerlu pingaartittorujussuaat, erseqqissumillu nalunaarutigereerpaat puisit amii piujuaannartitsineq tunngavigalugu atorneqarpata EU-mut eqqunnissaannut sukaterisoqartariaqanngitsoq aammalu sakkortunerusumik inerteqquteqartoqartariaqanngitsoq.

EU-p Siunnersuisooqatigiivi Parlamentilu puisit amii pillugit isumaqatiginninnialerpata Danmarkip tamanna tamakkiisumik, 100 procentimik, tapersersorniarpaa. Naalakkersuisut Danmark aamma EU puisinut peqqussut inunnut issittumi najugalinnut pitsaanngitsumik kinguneqannginnissaanik sukannersumik piumaffiginiarpai.

Puisit puisinniarnerlu ulluinnarni inuunitsinnut kulturitsinnullu pingaarutilerujussuupput, taamaattumik Naalakkersuisut akuerisinnaanngilaat piumasaqaatinik sukaterinissamut aammalu inerteqqussummik annertusinissamut, Naalakkersuisoq Karl-Kristian Kruse oqaaseqarnermini naqissusiivoq.

 

Annertunerusumik paasissutissat uunga saaffiginnissutigineqarsinnaapput:

Amalie Jessen, Immikkoortortami pisortaq

Toqq/direkte 345304

amalie@nanoq.gl