Martha Lund Olsen: Tasiortap sulinera asuliinnarsimanngilaq

AG-mi 25. februar 2015-imi atuagassiamut "Aningaasat peqqissaanernut atorneqarput" oqaaseqaatit.

”Ajortut uninnaveertarnerat unitsittariaqarlugulu unitsissavarput - matumani tamatta, partiimit suminngaanneersuuneq apeqqutaatinnagu tasiortariaqarpugut", Tasiorta 2013-imut ukiumoortumik nalunaarusiamini allappoq. Isumaginninnermut tunngasuni politikikkut akisussaasutut Tasiortap oqariartuutaa tamakkiisumik tapersersorpara Tasiortallu innuttaasunik kinguaassiuutitigut atornerlunneqarsimasunik ikiuiniarnermini suliniarnera akuersaarusullugu. Siulersuisunut ilaasortaasimasutut nalunngilara Tasiortap amerlasoorpassuit inuunermi ingerlaqqinnissamut ikiorsimagai.

Naalakkersuisut suliassaasa pingaarnerit ilagaat isumaginninnermi suliniutinik pitsanngorsaanissaq, inuttut atukkatigut kingornuttakkat ajortut inuiaqatigiit pitsaasumik ineriartornissaannut akornusersuiinnassanngippata. Naalakkersuisut tassunga atatillugu angalallutik katsorsaajartortartunik innuttaasunut kinguaassiuutitigut atornerlunneqarsimanermik kingunipilutsitsisunut nuna tamakkerlugu katsorsaasarsinnaasunik pilersitsinikkut kinguaassiuutitigut innarliisarnerit akiorniarlugit suliniutit pingaartippaat. Aammattaaq meeqqat illuat Saaffik Naalakkersuisut ineriartorteqqileruttorpaat, taamaalilluni meeqqanut inuusuttunullu kinguaassiuutitigut innarlerneqarsimasunut neqeroorutit ullumikkumut sanilliullugu nuna tamakkernerullugu neqeroorutaalersinniarlugit, taamatullu aamma nuna tamakkerlugu sianertarfiup 141-p pilerseqqinneqarnissaa sulissutigineqarluni.

 

Pisortat aningaasaliissutaat ukiuni tulliuttuni killeqassapput. Taamaattumik aningaasat atorlugit qanoq pissarsiaqarnerpaasinnaanerluta misissoqqissaassallugu immitsinnut piumaffigisariaqarpugut. Tassunga atatillugu allaffissornikkut aningaasartuutitigut sipaarnissaq avatangiisinillu suliatigut ineriartorfiusunik pilersitsinissaq anguniarlugu kinguaassiuutitigut innarliisarnerit akiorniarlugit suliniutit immikkoortortanut annerusunut ataatsimullu suliaqarfiusunut katersorneqarnissaat iluaqutaassasoraara.

 

Ilaqutariinnermut Naalakkersuisoqarfiup 2014-imi juunimi ataatsimiinnermi Tasiortamik suleqateqalernissamut periarfissat siusinnerusukkut misissorsimavai Tasiortamullu tapiissuteqarnissaq tunuarsimaarfiginagu. Qinnuteqaat suliarineqartinnagu 2015-imut Aningaasanut Inatsimmi tapiissutissatut immikkoortitat paaseqqaarneqartariaqarnerat pillugu Naalakkersuisoqarfiup Tasiorta ilisimatissimavaa. Tapiissutisinissamik qinnuteqaatit assigiisitsinissamik tunngaveqarneq aallaavigalugu ataatsimut suliarineqartarnerat pissusissamisoorpoq, taamaalilluni qinnuteqaatit tamarmik tapiissutisinissamut assigiimmik periarfissiiffiusarlutik.

 

Tamatumunnga nangitsissutitut Naalakkersuisoqarfik Tasiortamit qinnuteqaammik tigusaqarsimanngilaq taamaattumillu peqatigiiffimmut tapiissutit uniinnarsimapput. Taamaattorli Tasiortami sulinerup sukkulluunniit maangaannarsimannginneranik siulersuisut siulittaasuata Kisea Bruunip oqarnera isumaqatigilluinnarpara.

 

Annertunerusumik paasisaqarusunnermi saaffigineqarsinnaavoq: Sina Møller Kristiansen, oqa: +299 34 69 49