Nipisannut pisassiissutit aalisarsinnaanermullu akuersissutit

Nipisat MSC nalunaaqutserneqartartussanngormata nipisanniarnermut nutaanik maleruagassaqalerpoq. Inuussutissarsiutigalugu aalisartut aalisarsinnaanermut akuersissuteqassapput nipisallu pisarineqarsinnaasut killeqassapput, pisassiissutaassallutik.

nuussutissarsiuutigalugu ukioq manna nipisanniarneq ukiut siuliinit allaanerussuteqassaaq. Ukioq manna uku atuutsinneqassapput:

  • Inuussutissarsiutigalugu aalisartut tamarmik aalisarsinnaanerminnut akuersissuteqassapput.
  • Kitaani nipisannik pisassiisoqarpoq, NAFO-p aqutsiveqarfiini assigiinngitsuni pisassat aalajangersarneqarlutik,  taakkunani piffissat aalisarfiusussat aamma aalajangersarneqarlutik.
  • Sumiiffimmi aalisartut sinnissaasa tunitsiviillu qaqugu aalisalersinnaanissaq isumaqatigiissutigissavaat. Aalisalernissap aallartiffissaa Aalisarnermut, Piniarnermut Nunalerinermullu Naalakkersuisoqarfimmut nalunaarutigineqassaaq, kingusinnerpaamik sapaatip akunnera sioqqullugu nalunaarutigineqarsimassalluni.
  • Inuussutissarsiutigalugu aalisarneq pisassiinikkut aqunneqassaaq ullunilu 47-ni aalisartoqassalluni. Pisassiissutit nunguppata aalisarneq unitsinneqassaaq, ullulluunniit pineqartut nallerpata aalisarneq unitsinneqassalluni.
  • Nipisat pisassiissutigineqartut tassaapput taakkua suaat, katillugit 1.500 tonsit pisassiissutaallutik. Pisassiissutigineqartut biologit innersuussutaasa amerlaqatigaat. Takussutissiami NAFO-p aqutsiveqarfinni pisassiissutigineqartut atuarneqarsinnaapput.  

Nipisat pisassiissutigineqartut tassaapput taakkua suaat:

Suaat, tonsit

- NAFO 1A

63

- NAFO 1B

369

- NAFO 1C

267

- NAFO 1D

522

- NAFO 1E

165

- NAFO 1F

114

Kitaani katillugit

1500

Attavigineqarsinnaavoq: Aalisarnermut, Piniarnermut Nunalerinermullu Naalakkersuisoqarfimmi allaffimmi pisortaq, Jóhanna Lava Køtlum, email: jool@nanoq.gl