Nunalerineq pillugu Siunnersuisoqatigiinni siulittaasoq ingerlaqqippoq

Nunalerineq pillugu Siunnersuisoqatigiit 35-ssaat ulloq 24. februar 2015 Qaqortumi ataatsimiinnerminni una oqariartuutiginiarpaat:

Naalakkersuisunut ilaasortap Karl-Kristian Kruse-p Niels Lund Qaqortup eqqaani Qanisartuuni savaatilik Nunalerineq pillugu Siunnersuisoqatigiinnut siulittaasussatut toqqaqqippaa. Niels Lund 2013-imi siulittaasutut toqqagaavoq. Niels Lund aamma Savaatillit Peqatigiit Suleqatigissuni (SPS-imi) siulittaasuuvoq.

Siulittaasup ataatsimiinnermi nalunaarutigaa SPS tullissaanik ulloq 3. juli 2015 ataatsimeersuaarnerani savaatilittut inuussutissarsiutip Kujataanut pisortatigoortumik eqqunneqarneraniit ukiut 100-nngortorsiornissaat nalliuttorsiuutigineqassasoq.

Siulittaasup neriuutigaa Naalakkersuisut nutaat Nunalerineq pillugu Ataatsimiititaliarsuup inassuteqaataat tigulluarumaaraat, ineriartorneq pitsaanngitsoq pitsap tungaanut sangutinneqassappat malunnaateqarluartumik iliuuseqartoqartariaqarmat.

Taassuma saniatigut Siunnersuisoqatigiit siulittaasuata nunalerinermi inatsisitigut nutarsaasoqarluni sulineq aallartissimasoq tikilluaqquaa, Nunalerineq pillugu Ataatsimiititaliarsuup inassuteqaataanut naapertuummat.

”Nunalerineq pillugu inatsisit tamakkiisut pisoqalivallaarsimapput taamaattumik Nunalerineq pillugu Siunnersuisoqatigiit siulittaasuattut suliaq aallartissimasoq nuannaarutigaara”, siulittaasoq Niels Lund oqarpoq.

Annertunerusumik paasissutissat pissarsiarineqarsinnaapput uani:

Niels Lund
Nunalerineq pillugu Siunnersuisoqatigiit siulittaasuat
Oqarasuaat 199211