Nunatsinni pitsaaliuinermi siunnersortit ataatsimeersuarnerat

Pitsaaliuinermi siunnersortit 25-t nunatsinni piffinnit tamaneersut ataatsimeersuarnerat pikkorissartinneqarnerallu Peqqissutsimut Naalakkersuisoqarfiup ulluni makkunani i­nger­lappai. Ataatsimeersuarneq Nuummi ingerlanneqartoq ataasinngormat aallartippoq sapaatiuppallu naammassineqassalluni.

Peqqissuseq pisariitsuussaaq

Pitsaaliuinermi siunnersortit ataatsimeersuartinneqarnerat ukioq allortarlugu pisarpoq. Ukioq manna sammineqarpoq peqqissutsimut tunngatillugu perorsaaneq, pitsaaliuinermilu siunnersortit ilaatigut paasisaqarfigisussaavaat: ”peqqissuseq pitsanngortinniaraanni qanoq ilioraanni pitsaanerpaajua? Iliuusissat suut atorneqalissappat? Peqqinnerulersitsiniarnermi qanoq akuutitsisoqassava?

“Pitsaaliuinerup peqqinnerulersitsiniarnerullu assigiinngissutaat paasisaqarfigilluarpagut. Pitsaaliuilluni peqqinnerulersitsiniarluniluunniit imaluunniit taakku arlariit suliaqarfigissagaanni anguniakkat periutsillu assigiinngillat. Paasisimavarput peqqinnerulersitsiniarluni sulineq qanoq pingaaruteqartiginersoq, aamma pitsaaliuinermik suliaqarnitsinni”, taama oqarpoq Eva Kirkegaard, Kommuneqarfik Sermersuumi pitsaaliuinermi siunnersortaasoq.

Pujortartarunnaarsitsiniarnermi ilitsersuisutut pikkorissartarneq

Ataatsimeersuarnermut atatillugu pujortartarunnaarsitsiniarnermi ilitsersuisutut pikkorissartitsisoqassaaq, tamanna pivoq pitsaaliuinermi siunnersortit namminneq kissaataat malillugu. Pitsaaliuinermi siunnersortit illoqarfimminni nunaqarfimminniluunniit meeqqat inuusuttullu pujortartarunnaarsitsiniarluni pikkorissartinneqarnissaannut sakkussaqalertussaallutik.

Angerlamut kuffert-i ilavoq

Peqataasut kuffertinnguamik nerisat, pujortartarneq, imigassaq/ikiaroornartoq timillu aalatittarnera pillugit atortussanik imaqartumik tunineqarsimapput. Kuffertip imarai innuttaasunik kimeqarluartumik ataatsimiisitsinissani atugassat makkuusut: Akunnattoorutinik pinnguaat, nalorsitsaarinerit, minnerunngitsumillu usb-stikki tv-kkut aallakaatitassanik sisamaasunik imaqartoq taaguuteqartunik ’Periarfissaqarputit’, taakku qanoq ililluni peqqinnarnerusumik inuuneqarnissamut isumassarsisitsisinnaapput. Kuffertip imai suliarineqarsimapput Nunafondenimit tapiissuteqarfigineqarnikkut. ’Periarfissaqarputit’ aamma KNR-ikkut takutinneqassaaq ulluni 3. aamma 4. marts.

Paasissutissat sukumiinerusut pissarsiarineqarsinnaapput pisortap tullerigallagaa Leif Grønvold Jensen saaffigalugu, oqarasuaatikkut +299 34 66 16 imlt. e-mailikkut: legj@nanoq.gl.