Karl-Kristian Kruse Paamiuni

Aalisarnermut, Piniarnermut Nunalerinermullu Naalakkersuisoq, Karl-Kristian Kruse, Paamiuni aalisartut piniartullu pingasunngornermi, februaarip 26-anni, aalisartut piniartullu illuutaanni, ataatsimeeqatigivai.

Karl-Kristian Kruse ataatsimiinnermi najuuttunut ilaatigut ilisimatitsissutigivai Naalakkersuisooqatigiit isumaqatigiissutaanni pingaarnertut anguniagaanni aalisarnermut tunngasortai, ilaatigut tassaasut aalisarnermut inatsisip inaarsarnissaa, aalisakkanik tunisassiornermut iliuusissatut pilersaarut, aalisarnermi tulaassuisussaatitaaneq avammullu tunisassiareqqaarnagit suliat akitsuusersorneqarneri aamma nunatta avammut aalisarnikkut niuernerata missoqqissaarnissaa.   

Naalakkersuisuni ilaasortap aalisartunut piniartunullu nassuiaassutigisaasa ilaat aamma tassaapput piniarsinnaanermut aalisarsinnaanermullu akuersissutit kommuninit siunissami suliarineqartalernissaat, Tunumi aalisarnerup siuarsarnissaanut pingaartumillu tunitsiveqarnikkut tunisassiornerullu pillugit pilersaarummik iliuusissanillu suliaqarneq.

Karl-Kristian Krusep Ineqarnermut, Sanaartornermut Attaveqarnermullu Naalakkersuisoq Knud Kristiansen aamma Naalakkersuisut siulittaasuat Kim Kielsen Paamiuni innuttaasunik sisamanngornermi februaarip 26-anni ilagalugit ataatsimeeqatigititseqatigissavai.

Attavigineqarsinnaavoq Jørgen Isak Olsen, pisortaq, Aalisarnermut, Piniarnermut Nunalerinermullu Naalakkersuisoqarfik. E-mail: jio@nanoq.gl