Naalakkersuisut Paamiuni nukissamik nuannaarnermillu aallertut

Naalakkersuisut siulittaasuat Kim Kielsen pingasunngormat Paamiunukarpoq Naalakkersuisut siulittaasuattut illoqarfinnut nunaqarfinnullu tikeraarnissanut innuttaasunillu ataatsimiititsinissanut pilersaarutaasut aallarnerlugit.

Kim Kielsenip Ineqarnermut, Sanaartornermut Attaveqarnermullu Naalakkersuisoq Knud Kristiansen aamma Aalisarnermut, Piniarnermut Nunalerinermullu Naalakkersuisoq Karl-Kristian Kruse angalaqatigai. Paamiunut ulloq tikiffitsik Atuarfik Tuiisamut, Umiartornermut Ilinniarfimmut, Utoqqaat Illuannut, inersimasut tarnimikkut innarluutillit angerlarsiaffiannut Pallermut, Royal Greenlandip aalisakkerivianut aamma aalisartunut piniartunullu pulaarnermut atorpaat. Illoqarfiup innuttaasui taamaalillutik Naalakkersuisunut ilaasortat taakku pingasut pisortatiguunngitsumik ilassinissaannut periarfissinneqarput.

Unnukkut Paamiuni Siumut kaffillerpoq, Kim Kielsen pingaarnertut pulaartoralugu.

”Sinerissami illoqarfinnut tikeraarnerit illoqarfigisanni Paamiuni aallartinnissaat pingaartissimavara. Tamaani naalakkersuinermik suliaqarninnut nukissanik aallertarpunga”, Kim Kielsen sisamanngornermi innuttaasunik ataatsimiititsinermi oqarpoq.

Taqqissuutini innuttaasunik sisamanngornermi unnukkut ataatsimiititsineq, Kim Kielsenip, Knud Kristiansenip aamma Karl-Kristian Krusep pilersaarutiminnik saqqummiussivigisaat, ornigarneqarluarpoq. Unnuk taanna pingaarnertut apeqqutigineqartut ilaatigut tassaapput inissiat nutarternissaat, aalisarneq aamma umiarsualiveqarneq.

Kim Kielsenip tallimanngorneq Mittarfeqarfinnut, Nukissiorfinnut Inissiaatileqatigiiffik INI A/S-imut kiisalu meeqqat arparlutik unammisinneqarnerannut atorpaa.

Paamiuniinnermit assit.

 

Paasisaqarnerorusuttut attavigisinnaavaat Naalakkersuisut Siulittaasuat Kim Kielsen allattaa Kirsten Enequist aqqutigalugu, oqarasuaat +299 583754 imaluunniit e-mail: kien@nanoq.gl.