Pituffimmi sakkutooqarfik pillugu Danmarkip iliuuseqarnera toqqissisimananngitsoq

Vittus Qujaukitsoq: Pituffimmi sakkutooqarfik pillugu suliap ingerlanneqarnerani Danmarkip iliuuseqarnera toqqissisimanartinngilara

Inuussutissarsiornermut, Suliffeqarnermut, Niuernermut Nunanullu Allanut Naalakkersuisup amerikamiut nunanut allanut ministeriaqarfiannik aammalu illersornissamut ministeriaqarfiannik ataatsimeeqateqareerluni imatut oqaaseqarpoq:

”Tusagassiutit aqqutigalugit ullumi paasivara danskit nunanut allanut ministeriaqarfiat juulimi 2014-mi immikkut USA-mik oqaloqateqartarsimasut, tassanilu danskit-kalaallit suliffeqarfiisa qinnuteqarsinnaanerannik akuersissuteqartarnermut Kalaallit Nunaat akuutinneqarsimanngitsoq.

Danskit nunanut allanut ministeriat ullumi sivikitsumik ataatsimeeqatigaara, aammalu paasissutissat nutaat tupaallaatigisimallugit oqaatigalugu. Paasissutissat nutaat toqqammavigalugit killiffik toqqissisimanartinngilara. 

Nunanut allanut ministerip erseqqissaatigaa Danmarkip USA-llu akornanni, Kalaallit Nunaat akuutinnagu, immikkut oqaloqatigiittoqartarsimanera pillugu suliaq qulaajaaffigitilersimallugu.

Pisut aviisini qulaajaaffigineqartut maannakkut takutippaat danskit oqaloqatigiinnittarsimasut, Kalaallit Nunaat suliami tamakkiisumik akulerutinneqassasoq qulakkeerneqassasoq neriorsuutigineqaraluartoq sakkutooqarfik pillugu immikkut ittumik oqaloqatiginnittoqartoq, naak Kalaallit Nunaat tamanna pillugu ilisimatinneqarsimanngilluinnaraluartoq.”

Inuussutissarsiornermut, Suliffeqarnermut, Niuernermut Nunanullu Allanut Naalakkersuisup Vittus Qujaukitsup danskit nunanut allanut ministeriat paaseqatigalugu februaarip 23-iani 2015-mi amerikamiut nunanut allanut ministeriaqarfiat aammalu illersornissamut ministeriaqarfiat ataatsimeeqatigaa.

Vittus Qujaukitsup Inatsisartut Nunanut Allanut Sillimaniarnermullu Ataatsimiititaliaat tallimanngornermi februaarip 27-iani 2015-mi ilisimatitsilluni ataatsimeeqateqassaaq, tassanilu suliap ineriartornera pillugu oqaloqatigiinnittoqassaaq.

 

Sukumiinerusumik paasissutissanik pissarsisoqarsinnaavoq nunanut allanut pisortaq Kai Holst Andersen oqarasuaat +45 40178293 / +299 553331 aqqutigalugu.