Qalerallit suliffippassuarnik pilersitsipput

Kruse isumasioqatigiittunut: Qaleraliit tulaanneqartussaatitaasut suliffippassuarnik pilersitsipput

Aalisarnermut, Piniarnermut Nunalerinermullu Naalakkersuisoq Karl-Kristian Kruse Qeqqata Kommuniata inuussutissarsiutit suliffissaqartitsiniarnerlu pillugit Kangerlussuarmi isumasioqatigiisitsinerani  ataasinngormat februaarip 23-anni oqalugiarluni erseqqissaavoq qalerallit tulaanneqartussaatitaasut, Maniitsumut tulaanneqartartut, Royal Greenlandip aalisakkeriviani suliffissanik ikinnerpaamik 60-inik pilersitsisimasut. 

Naalakkersuisuni ilaasortap erseqqissarpaa Naalakkersuisut pingaartikkaat nunami suliffinnik qulakkeerinnittoqarsimanissaa.

- Nunami suliffissaqartitsiniarnermut assersuutissaqqippoq avataani qalerallit immikkut 1.500 tonsit avataasiortunut 2014-imi pisassiissutigineqarmata. Qalerallit pisassiissutigineqarmata piumasarineqarpoq qalerallit tamaviisa, 100 procentit, Maniitsumi aalisakkerivimmi suliassanngorlugit tulaanneqassasut. Nunami suliffissanik pilersitsisoqarsinnaasunngorlugu, Karl-Kristian Kruse oqarpoq.

Qalerallit Maniitsup aalisakkeriviani sunniuteqarluartumik tunisassiarinissaat  pilersinnaaleqqullugu, aalisakkerivik ullutsinnut naleqqussarlugu aalisakkerissutinik nutaanik atortulersorneqarpoq.

- Qalerallerisut 60-it missaanniipput. Qalerallerinermut attuumassuteqanngitsut matumani ilaanngitsut tassaapput, tunisassiornermili pisariaqartinneqartut, laborantit, allaffimmiut naatsorsuutinik misissuisartut teknikerillu, Naalakkersuisuni ilaasortaq erseqqissaavoq.

Karl-Kristian Krusep oqalugiaataa atuarsinnaavat uani

 

Attavigineqarsinnaavoq Jørgen Isak Olsen, pisortaq, Aalisarnermut, Piniarnermut Nunalerinermullu Naalakkersuisoqarfik. E-mail: jio@nanoq.gl