Tamat suleqatigiinnissaat Naalakkersuisut kissaatigaat

Borgmester Asii Chemnitz Narup Nuuk TV-mi ippassaq oqarpoq, Kommuneqarfik Sermersuup KANUKOKA-mit aninissaanut ilutigitillugu Naalakkersuisut kommunemut ilisimatitsisimasut Namminersorlutik Oqartussat pingasuulluni isumaqatigiinniartoqarnissaanik pilersaaruteqanngitsut.

Naalakkersuisut Siulittaasuat Kim Kielsen:

”Suliaq tamanna borgmesterilu oqaloqatigiissutigaarput. Ilisimatitsissutigaara nuna tamakkerlugu suliassanut tunngatillugu Naalakkersuisut Kommuneqarfik Sermersuumik isumaqatiginninniartannginnissaq aalajangiusimagakku. Kommunit nukittuumik peqatigiiffeqartariaqarput isumaqatigiinniarnerni peqataasinnaasumik, taamaalilluta suliassarpassuit erloqinartut ataatsimoorluta aaqqiissuteqarfigisinnaassallutigit. Aamma ilisimatitsissutigaara tatigeqatigiilluta oqaloqatigiissinnaasariaqartugut.

Kommunit suleqatigiinnermikkut angusaqarnerusinnaasut avataaniikkaanilu angusaqarnannginnerusoq isumaqarpunga. Nutaamik isumaqatiginninniariaaseqalissagaluaruttakommunit immikkuutitaarlutik Namminersorlutik Oqartussanik isumaqatiginninniartarlutik, kommunit ullumikkornit sunniutikinnerulissapput.

Suleqatigiissinnaanissarput sulissutiginiarpara.”

 

Paasisaqarnerorusuttut attavigisinnaavaat immikkoortortaqarfimmi pisoortaq Hans-Erik Bresson, Nunami Namminermi pisunut Allaffeqarfik, oqarasuaat +299 34 50 00 imaluunnit e-mail haeb@n.anoq.gl