Naalakkersuisut Siulittaasuat Future Greenland-imi peqataassaaq

Ataatsimiinnermi Future Greenland-imi peqataanissamut GA-mit marlunngornermi ulloq 17. februar kaammattorneqarnera tunngavigalugu nalunaarutigisinnaavara, peqataaniarlunga aalajangerama. Taamannak aalajangerpunga kaammattuummi ilanngullugu allassimammat Michael Binzer oqaaseqartussat pingaarnerit ilaattut peqataanissaminik tunuartoq.

Pisut ingerlanerat ajornartorsiutitaqartutut sakkortuumillu isornartoqartutut maannakkut GA-mit aamma IA-mit saqqummiunneqarpoq, Michael Binzerip oqalugiartussanit tunuartinniarlugu Naalakkersuisut pisariaqanngitsumik GA-mut tatisimanninnerarneqarlutik. Tassunga tunngatillugu Naalakkersuisut siullermik peqataarusussimannginnerannik nassuiaateqarniarpunga.

Naalakkersuisut novembarimi 2014-imi ilisimatinneqarput Michael Binzerip CV-a ilumut ilinniagarisimasaanut naleqqutinngitsoq. Tamanna Michael Binzerip ajuusaarutigalugu nammineq tamanut oqaatigaa.

Tamanna ilungersunartutut nalilerpara, ilaatigut Michael Binzerip Namminersorlutik Oqartussat selskabiini ukiorpaalunni pisortatut atorfeqarsimanera oqaaseqartartuusimaneralu pissutigalugit. Taamaammat GA-p Future Greenland-imik taallugu ataatsimeersuartitsinissaanut pingaarnertut oqalugiarnissamut qaaqqussutaa itigartippara. Ataatsimeersuarnermi Namminersorlutik Oqartussat selskabiutai, eqqunngitsumik tunngaveqarluni pisortaaffigisimasani, pillugit Michael Binzerip oqalugiarneranik ilaqartumi peqataanissara aporfissaqartissimavara.

GA-p nammineerluni toqqaaneri pingaarnersiuinerilu tamakkiisumik ataqqivavut, paarlattuanillu GA aamma ataqqinnittariaqarpoq. Suliaq maanna aaqqippoq Michael Binzer oqalugiartussatut tunuarmat, tamannalu ataqqivarput. Pissanganartumik pissarsiaqarnartumillu ataatsimeersuaqataanissannut qilanaarpunga.

 

Paasisaqarnerorusuttut attavigisinnaavaat Naalakkersuisut Siulittaasuat Kim Kielsen allattaa Kirsten Enequist aqqutigalugu, oqarasuaat +299 34 50 00 imaluunniit e-mail kien@nanoq.gl.