Sapaatip akunnerani 18-imi oqallinnermut tapersiigit

Meeqqat inuusuttullu imigassamik atuisarnerannut tunngatillugu inersimasut akisussaanerat pillugu oqallisitsilernissamut peqataarusuppit? Taava maannakkut sapaatit akunneranut aningaasanit immikkoortitanit qinnuteqassaatit.

Sapaatit akunnerat 18 tassaavoq, innuttaasut, atuarfiit, peqatigiiffiit, pinaveersaartitsinermut ataatsimiititaliat kommunillu sammisaqartitsinissanik pilersaarusiornissamik ingerlatsinissamillu kaammattorneqartarnerat.

Sapaatit akunneranni 18-imi sammisaqartitsinissamut aningaasanik Peqqissutsimut Naalakkersuisoqarfimmut ulloq 15. marts tikillugu qinnuteqaateqarnissannut periarfissaqarputit.

Sapaatit akunneranni 18-imi ukioq manna qulequtaq tassaavoq ”Inersimasutut akisussaaffik”. Meeqqat inuusuttullu peqqissusaannut pingaarteqarpoq inuuneranni inersimasut akuunissaat.

-Meeqqat inuusuttullu imigassamik aanngajaarniutinillu allanik atuisarnerisa pinaveersaartinneqarnissaanut inersimasut periarfissarissaaqaat. Assersuutigalugu imigassaq pillugu pitsaasumik ammasumillu oqaloqateqartarnikkut, killiliisarnikkut aamma meeqqat inuusuttullu sunngiffimminni sammisaqartarnissaannik tapersertarnerisigut”, taamatut oqarpoq Peqqissutsimut Naalakkersuisoq Martha Lund Olsen nangillunilu.

”Neriuppunga Sapaatit akunneranni 18-imi sumiiffinni sammisaqartitsinerit peqatigiinnikkut, oqaloqatigiinnikkut peqataanikkullu meeqqat inuusuttullu inuuneranni imigassartaqanngitsumik toqqissisimasumik ineriartornissaat aamma pitsaasumik isumaqarluartumillu inuunissaat pillugu oqariartuummik siammarteriffiussasut”.

Imigassaq Ikiaroornartullu pillugit Siunnersuisoqatigiit imigassaq pillugu siunnersuutaat pingasut Sapaatit akunneranni 18-mi aallaaviupput:

  • Meeqqat inuusuttullu 18-it inorlugit ukiullit imigassartunngivissapput.
  • Naartuguit – imigassartornak. Naartuniarsariguit – imigassartornak.
  • Imigassartornermi ataatsimi amerlanerpaamik sisamat immikkut.

 

Sapaatit akunnerat 18 pillugu paasissutissat qinnuteqarnermilu immersugassaq uani takuneqarsinnaapput: www.peqqik.gl/sapak18

 

Annertunerusumik paasisaqarusukkuit Peqqissutsimut siunnersorti Lisa Christiansen attaveqarfigiuk tlf: +299 34 66 50 imaluunniit e-mail: lich@nanoq.gl.