Pituffik pillugu suliap inernera naammaginanngilaq

Danmarkimi nunanut allanut ministeri Martin Lidegaard aamma Inuussutissarsiornermut, Suliffeqarnermut Niuernermullu Naalakkersuisoq Vittus Qujaukitsoq isumaqarput Pituffik pillugu suliap inernera naammaginanngitsoq.

Amerikamiut naalagaaffimmi kukkunersiuisartuata (Government Accountability Office) Pituffimmi Sakkutooqarfimmi isumaqatigiissutip Exelis Services A/S-imut tunniunneqarneranut akerliliissutaasut suliarineqareernerisa kingorna aalajangeereernerani, nunanut allanut ministeri Martin Lidegaard Washington-imi tikeraarnermi nalaani oqarpoq: 

"Inernera tupaallaatigaara, tamannalu naammaginanngilaq. Danmarki aamma Kalaallit Nunaat isumaqanngillat Exelis Services A/S-ip attanneqaannarnera isumaqatigiissummut tunngaviusunut naapertuuttoq. Oqaatigisariaqarparput danskiunissamut/kalaaliunissamut tunngaviusut qanoq isumaqarnerannut imarisaannullu amerikamiut tungaanniit, Nunanut allanut ministereqarfiup aamma Namminersorlutik Oqartussat ataatsimoorlutik paasinninnerannit allaanerusumik paasinnittoqarsimarpasittoq. 

Ullumi uanga suleqatiga Kalaallit Nunaanneersoq aammalu Nunanut allanut Naalakkersuisuusoq Vittus Qujaukitsoq isumaqatigiissuteqarfigaara, Pituffimmi sakkutooqarfimmit Kalaallit Nunaata sapinngisamik annertunerpaamik iluaquteqartinneqarnissaa qulakkeerniarlugu – aammalu nalornissutaasut tamaasa nalornissutaajunnaarsinniarlugit – Danmarkip aamma Kalaallit Nunaata ataatsimoorlutik USA-mut tatisimanninnertik ingerlatiinnassagaat. Pentagon-imi ataatsimiinnermi suliap qaqinnissaanut periarfissaqalereerpunga, taamatullu amerikamiut nunanut allanut ministeriannut John Kerry-mut aamma nunami namminermi isumannaallisaanermut siunnersortimut Susan Rice-mut ullumi kingusinnerusukkut suliaq qaqissavara." 

Vittus Qujaukitsoq oqarpoq: 

"Naalakkersuisut aamma danskit naalakkersuisuisa suliami matumani qanimut suleqatigiinnertik ingerlatiinnarniarpaat, aammalu uanga Martin Lidegaard-ituulli qularutiginngilluinnarpara, isumaqatigiissummut tunngaviusuni siunnerfiusoq anersaarineqartorlu malillugit illuatungeriit pisussaaffeqartinneqarnerattut, inuiaqatigiit kalaallit Pituffimmi sakkutooqarfimmit sapinngisamik annertunerpaamik iluaquteqartinneqarnerat ingerlaannassasoq, aammalu siunissami pisussat periarfissallu Danmarkimut USA-mullu oqaloqatigiissutiginissaat qilanaaraara." 

Ilanngullugu ilisimatitsissutigineqassaaq Vittus Qujaukitsup Inatsisartut Nunanut Allanut Sillimaniarnermullu Ataatsimiititaliaat suliaq pillugu ataatsimeeqatigeqqammermagu.

Annertunerusumik paasisaqarusunnermi attaveqarfigineqassaaq immikkut siunnersorti Asbjørn Haugstrup på tlf. +4526729421 imaluunniit nunanut allanut pisortaqarfimmi pisortaq Kai H. Andersen +299553331.