Siulersuisunik isumasioqatigiissitsineq kinguneqarluarlunilu pissarsiaqarnarpoq

Namminersorlutik Oqartussat selskabiutaanni siulersuisut pisortallu qinikkat atorfilittallu 100-ut tungaannut amerlassusillit Siulersuisut Isumasioqatigiinnerat 2015-imut ippassaq ingerlanneqartumut peqataapput. Tassani ” Kalaallit Nunaanni siuariartornissamut periarfissat”, aamma isumasioqatigiissitsinermut qulequtaritinneqartoq, sammillugit saqqummiunneqarput oqallisigineqarlutillu.

Naalakkersuisut Siulittaasuat Kim Kielsen oqarpoq:

”Isumasioqatigiinneq kinguneqarluarlunilu pissarsiaqarnarpoq, tassani inuussutissarsiornerup siuarsarnissaata ineriartortinnissaatalu qulakkeerinninnissamut inuussutissarsiornermik suliaqartut ilisimasaminnik, misilittakkaminnik isumassarsiaminnillu paarlaasseqatigiittut tusarnaarsinnaallutigit. Inuussutissarsiuteqartut aallartiffissarsilluarput uagullu qinikkat nunatsinni inuussutisarsiornermik pitsaanerusumik atugassaqartitsilernissatsinnut tunngavissaqarlualerluta.”

Naalakkersuisut Siulittaasuat Kim Kielsen, Aningaasaqarnermut Aatsitassanullu Naalakkersuisoq Anda Uldum aamma Ineqarnermut, Sanaartornermut Attaveqaqatigiinnermullu Naalakkersuisoq Knud Kristiansen Naalakkersuisut ukiuni tulliuttuni sisamani aningaasarsiornikkut siuarsaanissamut pilersaarutitik, aningaasaliinissamut pilersaarutini pingaarnersiuinissartik nunattalu ineriartortinnissaanut siunniussatik saqqummiuppaat.

Tamanna ataatsimeeriaatsimik nutaamik ”Open Space”-imik taaneqartartumik nanginneqarpoq, peqataasut sammisanut assigiinngitsunut eqimattakkaarlugit agguarneqarlutik. Ataatsimeeriaatsimi periuserineqarpoq kinaluunniit peqataasoq peqataasussani eqqortuusoq, susoqaraluarpalluunniit allatut pisoqarsinnaanngitsoq, piffissanngorpat – piffissaq eqqorlugu – aallartittoqassasoq ataatsimiinnerlu naappat tassa naassasoq. Ataatsimeeriaaseq tamanna iluatsilluarpoq siunissamilu aamma atorneqartarumaarluni.

Ullormi pisut kusanaqisumik avatangiisilerluni Ilimmarfimmi naggaserneqarput nereqatigiinnermik, N.A.I.P.-kkormiut qitimmik, nipilersornermik qilaatersornermillu aliikkusersuisoralugit.

Naalakkersuisut Siulittaasuata Kim Kielsenip powerpoint-imik saqqummiussaa

Aningaasanut Aatsitassanullu Naalakkersuisup Anda Uldumip powerpoint-imik saqqummiussaa

Ineqarnermut, Sanaartornermut Attaveqaqatigiinnermullu Naalakkersuisup Knud Kristiansenip powerpoint-imik saqqummiussaa

Siulersuisut Isumasioqatigiinnerat 2015-imut pilersaarut (qallunaatut)

”Open Space”pillugu powerpoint

”Open Space”pillugu nassuiaat

Siulersuisut Isumasioqatigiinnerat 2015 pillugu Naalakkersuisut Siulittaasuata Kim Kielsenip Sermitsiami sap.ak. 7-imi isumaliutersuutaa atuaruk

Assilisat takukkit.

 

 

Paasisaqarnerorusuttut attavigisinnaavaat Ingerlatseqatigiiffinnut Allattoqarfimmi pisortaq Rasmus Pedersen, oqarasuaat +299 34 50 00 imaluunniit e-mail rasp@nanoq.gl.