Suliffissaaleqisunut suliniuteqarneq Naalakkersuisut ingerlateqqippaat

Suliffissaaleqisunut suliniuteqarneq Naalakkersuisut ingerlateqqippaat

Narsami immikkut ittumik suliniuteqarneq

Narsami suliffissaaleqisorpassuaqartoq Naalakkersuisut eqqumaffigaat. Taamaattumik Naalakkersuisut Kommune Kujalleq suleqatigalugu suliniutit arlallit, kujataani illoqarfimmi innuttaasunik suliffissaaleqisunik ikinnerulersitsisussat, aallartippaat.

Suliniuterpassuit assigiinngitsut maannakkut aammalu siunissami qaninnermi aallartinneqassapput. Suliniutit inuussutissarsiornermi aalisarnermilu suliassanut aalajangersimasunut sanaartornermik suliassanik siuartitsinermit aammalu suliffeqanngitsut akornanni pikkorissartitsinermik suliniutinut tunngapput.

”Naalakkersuisut Kommune Kujallermik suleqateqarnerat naammagisimaarpara aammalu ukioq qaangiuppat Narsami suliffissaaleqisut amerlassusaanni tamanna takusinnaassagipput naatsorsuutigilluinnarpara”, Vittus Qujaukitsoq, Inuussutissarsiornermut, Suliffeqarnermut, Niuernermut Nunanullu Allanut Naalakkersuisoq naammagisimaarinnilluni erseqqissaavoq.

Narsami illuutinik isaterinissamut, iluarsaassinissamut allilerinissamullu 50 millioner koruunit sinnerlugit Naalakkersuisut immikkoortitsisimanerat tassani aalajangersimasumik pineqarpoq. Tamannalu tassani unitsinneqassanngilaq. Sanaartugassat ilaat 2016-imi aallartinneqassaaq, taamaalilluni tamanna ataasiaannartumik pissanani.
”Narsami suliffissaaleqisut ikilisinniarnissaat siunertaralugu Naalakkersuisut suleqatigalugit suleqatigiinneq taanna aallartikkatsigu nuannaarutigaara, tamanna Narsami innuttaasunut pingaaruteqartorujussuusussaavoq. Aammalu ukiuni aggersuni Naalakkersuisut pilersitsiviulluartumik suleqatiginerat ingerlaannarsinnaassasoq Kommune Kujallermi neriuutigaarput”, oqarpoq Kommune Kujallermi borgmesteri, Jørgen Wæver Johansen.
Nunaqarfinni isorliunerusunilu Inuussutissarsiornermut Suliffissaqartitsiniarnermullu suliniuteqarnermit Kommune Kujalleq 2,5 millioner koruuninik pissarsitinneqarpoq, tassani suliassanut attuumassuteqartunut aningaasaliissutit ilai Narsamut eqqaanullu tutsinnissaannik kommuni periarfissaqarluni. Tassunga atatillugu inuussutissalerinermut festivaleqartitsinissaq, illoqarfiup siuariartortinneqarneranut suliffissaqartitsiniarnermullu iluaqutaasussaq kommunip nammineerluni siunnersuutigaa.

Aamma illoqarfimmi suliffissanik pilersitsisinnaanissamut, Narsami tunitsivimmut saarullittassiinissamik periarfissat Naalakkersuisut misissorpaat.

Immikkut ittumik Suliffissaaleqisunut suliniuteqarneq aqqutigalugu, Naalakkersuisut kommuni suleqatigalugu pikkorissaaneq, inuussuttunut ilaatigut avataasiorluni aalisartutut inuuniuteqarnissamik sapiissuseqartunut sammitinneqartoq, taakkununnga tulluartumik ilusilersorpaat. Taakkua kilisaammi aamma angallatini ningittagarsortuni suliffeqalernissaat siunnerfigineqarpoq. Pikkorissaaneq 24-inik pikkorissartunik peqataaffigineqartumik apriilimi aallartissasoq naatsorsuutigineqarpoq.

Tulliullugu paasinarsisitsiniarluni oqaloqateqarnerit arlallit ingerlannissaannut – kiisalu sumiiffimmi suliffeqarfinnut suliffissarsiortunullu attaveqarnermik pilersitsinissamut – kommuni Narsami suliffissanut ilitsersuinermilu siunnersortimik atorfinitsitsisimavoq.

Suliniuteqarnerup taassuma ataani, inuusuttut atuagarsorfiunngitsumik ilinnialersinniarlugit Narsami Piareersarfimmut aningaasanik immikkoortitsisoqarpoq. Maannakkorpiaq inuusuttut 23-it ingerlatami tassaniitinneqarput.


Tunngaviusoq:
2015-imi januaarimi suliffissaaleqisutut nalunaarsorsimasut
2015-imi januaarimi katillugit 4.402-it suliffissaaleqisutut nalunaarsorneqarput, taakkunannga 737-it nunaqarfinniillutik. Taakkua ukiup siuliani qaammammut tassunga sanilliullugu inunnik 552-inik ikinnerupput.


Erseqqinnerusumik paasissutissanik piniarnermi attaveqarfigineqassaaq Naalakkersuisumut allatsi Camilla Bruun Djarnis tlf. 34 56 11 imaluunniit kommunaldirektøri Frank Hedegaard Jørgensen tlf. 49 01 33