Ukiuunerani 2015-mi tuttunniarnissaq

Piffissami 30. december 2014-imiit 30. januar 2015 ilanngullugu tamanut tusarniutigineqarnerani akissuteqaatit tunngavigalugit aalajangerneqarpoq aqutsiveqarfinni taaneqartuni ukiuunerani tuttunniartoqarsinnaanera.

Aalisarnermut Piniarnermut Nunalerinermullu Naalakkersuisoq 16. februar 2015-mi aalajangerpoq sapaatip akunnerini pingasuni inuussutissarsiutigalugu piniartutut allagartalinnut piffissami 17. februarimiit 10. martsi ilanngullugu 2015-mi aqutsiveqarfinni ukunani ukiuunerani tuttunniartoqassasoq:

1) Ammasumik Nuussuup qeqertaasaani (aqutsiveqarfik 8)

2) tuttut 100-t Naternami (aqutsiveqarfik 1)

3) tuttut 100-t Ameralimmi (aqutsiveqarfik 4)

4) tuttut 100-t Qeqertarsuatsiaani (aqutsiveqarfik 5)

5) tuttut 100-t Qassimi (aqutsiveqarfik 6)

6) tuttut 100-t Neria-mi (aqutsiveqarfik 7)

7) Piniarnerup nalaani qamuteralaat atorneqaqqusaanngillaq, aamma tuttutanik assartuutitut atoqqusaanngillaq.

Naalakkersuisup erseqqissaatigaa pisassiissutit piffissarlu ilaqqinneqassanngitsut. Ukiuunerani tuttunniarnermut atatillugu aammattaaq piumasaqaataavoq pisaqareernerup kingorna pisanik nalunaarsuiffiit immersorneqarnissaat taakkulu kommunip sullissivianut ingerlaannaq utertinneqartarnissaat.

Ukiuunerani tuttunniarnissap ammaqqinneqarnissaa Qeqqata Kommunianiit aamma Kommuneqarfik Sermersuumiit taperserneqanngilaq tassanilu tuttut ukiuunerani pisariaqartumik eqqissisimatinneqarnissaannut aamma akiliisitsilluni piniartitsisinnaanerup suli atorluarnerulernissaanut innersuussillutik. KNAPK aamma Qaasuitsup Kommunia ukiuunerani tuttunniarnissap ammaqqinneqarnissaa kissaatigivaat.

Pinngortitaleriffik aqutsiveqarfinni Naternami, Kangerlussuaq-Sisimiuni, Akia-Maniitsumi Ameralimmi, Qeqertarsuatsiaani, Qassini, Neriami kiisalu Ivittuuni/Aqutsiveqarfik 11-mi ukiuunerani tuttunniartoqannginnissaa siunnersuinermini inassutigeqqippaa.

Taamaakkaluartorli Pinngortitaleriffik Nuussuarmi ukiuunerani 2015-mi tuttunniartoqarnissaa inassutigaat pissutigalugu Saqqami tuttoqarluarnera, norraqarluanera kiisalu piffimmi inuussutissat navianartorsiornerat Nuussuarmi tamani atuussasoq naatsorsuutigineqarmat. Taassuma saniatigut februar 2015-imi nunap sermersimanissaa pissutigalugu ukiuunerani 2015-mi pinngortitami toquinnartartut amerliartorsinnaassasut taamaattumillu ukiuunerani sivisunngitsumik annerpaamillu sapaatip akunnerini pingasuni Nuussuarmi tuttunniartoqarnissaa inassutigineqarluni. 

Pinngortitaleriffiup inassutiqaatimini erseqqissaatigaa taamaallaat tuttunik ikilisaasoqartariaqarnera pissutigalugu ukiuunerani tuttunniartoqartarnissaa. Nuussuarmi tuttut amerlassusaat km2-mut 1,2-mut appareersimalerpat ukiuunerani tuttunniarneq inassutigineqarunnaassasoq.

 

Paasissutissanik erseqqinnerusut pillugit uunga saaffiginittoqarsinnaavoq Immikkoortortaqarfimmi Pisortaq Amalie Jessen, amalie@nanoq.gl, tlf. 345304