Sinerissap qanittuani saarulliit 25.000 tonsit aalisarneqassapput

Naalakkersuisut aalisakkanut assigiinngitsunut 15-inut ukioq manna pisassiissutit tallimanngormat, februaarip 13-anni  aalajangerpaat.

Aalajangernerat pisaassiissutinut arlalinnik nutaartaqarpoq.

Avannaani aalisartut amerlanernik qaleralinniarsinnaalissapput. Avaleraasartoorniarneq misiligutaajunnaarluni nalinginnaasumilli aalisarneqalissaaq. Kitaani aamma avaleraasartuunik pisassiisoqarluni.  Nipisat suaat MSC-mik nalunaaqutserneqartalissapput.

Naalakkersuisut aalajangerput sinerissap qanittuani saarullittassat 25.000 tonsiussasut. Pisassanut aalajangiinermut tunngavigineqartoq tassaavoq saarulliit tamarmik pisarineqartut nunamut tulaanneqarlutik suliassaqartitsisinnaassammata.

Pinngortitaleriffiup innersuussutai 12.379 tonsiupput.

Qalerallit

Naalakkersuisut aamma aalajangerpaat aqutsiveqarfinni Qeqertarsuup Tunuani, Uummannami Upernavimmilu qalerallit  pisassissutit ukiuni kingullerni pisassiissutaasartunit amerlanerussasut.

Upernavimmi qaleralinniartut qalerallit ukioq manna 9.500 tonsit aalisarsinnaassavaat, taamalu amerlatigisut aamma Uummannami aalisartut aalisarsinnaassavaat,  Qeqertarsuup Tunuani 9.200 tonsit aalisarneqarsinnaallutik.

Qaleralittassiissutit Pinngortitaleriffiup innersuussutaanit amerlanerupput, amerlinerunerinut suliffissaqartitsiniarneq tunngavigineqarpoq.

Pinngortitaleriffik aqutsiveqarfinnut Qeqertarsuup Tunuani, Uummannami Upernavimmilu  ukiunut marlunnut 2015/2016 atuuttussanut pisarineqarsinnaasunik innersuussaqarpoq.

Qeqertarsuup Tunuani ukiuni 2015 aamma 2016 ukiumut 8.000 tonsit aalisarneqarsinnaasutut innersuussaqarpoq. Uummannami ukiumut 6.000 tonsit. Upernavimmut aatsaat innersuussisoqarpoq. Ukiumut amerlanerpaamik 6.000 tonsit tamaani aalisarneqarsinnaasutut innersuussutigineqarput.

 Avaleraasartuut

Naalakkersuisut aamma aalajangerput Tunumi misiligutaasumik avaleraasartoorniartoqassanngitsoq, nalinginnaasumik aalisarneqassallutik. Pisassiissutigineqartut 85.000 tonsiupput. Kitaani aamma avaleraasartuunik 15.000 tonsinik pisassiisoqarpoq. Avaleraasartuut  78.000 tonsit siorna pisarineqarput.

Assagiarsuit

Assagiartassiissutigineqartut 2014-imitut amerlatigipput. Sinerissap qanittuani 2.550 tonsit pisassiissutigineqarlutik, avataani 250 tonsit.

Nipisat suaat

Aalisarnermik inuussutissarsiuteqartut nipisaat suaat MSC-mik meqqilerneqarnissaannik kissaateqarnerat naapertorlugu meqqilersorneqassapput.

Nipisat suanniarneq siusinnerusukkut killilersugaanngilaq, aqutsinissamulli pilersaarut aqqutigalugu siunnersuutigineqarpoq ataatsimut pisassiissuteqartarnissaq maanna atuutsinneqalissasoq, tassani pisassiissutit ikinnerusunngorlugit agguarneqassapput. Aalisarfinni pineqartuni pisarineqareersimasut aallaavigalugit aalisarfiusuni tamani pisassiissutit 85 procentiussallutik. Pisassiissutit tamarmiusut 15 procentii sinneruttut aalisarfiit akornini naligiimmik agguaanneqassallutik.

Aalisakkat pisassiissutigineqartut allat tassaapput nataarnat, imminnguit, qeeqqat, issittup saarullia, Kitaani suluppaakkat, Tunumi suluppaakkat, Tunumi 66 gradimit avannarpasinnerusumiittut suluppaakkat, qeeqqat, ammassassuit, saarullernat, guldlaksit ilaat.

Aajuna pisassiissutigineqartunut takussutissiaq

Attavigineqarsinnaavoq Aalisarnermut, Piniarnermut Nunalerinermullu Naalakkersuisoqarfimmi  immikkoortortaqarfimmi pisortaq, Emanuel Rosing, e-mail:emanuel@nanoq.gl