Inissianit attartortittakkanit anisitaasarnerit

Kommune Kujallermi inissianit attartortittakkanit anisitaasarnerit suleqatigiissitamit misissorneqassapput

Kommune Kujallermi borgmesteri Jørgen Wæver Johansen (S) aamma Ineqarnermut, Sanaartornermut Attaveqaqatigiinnermullu Naalakkersuisoq Knud Kristiansen (A) suleqatigiissitamik, Kommune Kujallermi, matumanilu pingaartumik Narsap illoqarfiani anisitaasarnerit ajornartorsiutaanerannik misissuisussamik pilersitsisoqassasoq isumaqatigiipput.

Suleqatigiissitaq ukioq manna juunip ulluisa aallaqqaataat nallertinnagu pingaartumik Narsami, kisiannili aamma kommunimi najugaqarfinni allani ineqarnermut akiitsut ajornartorsiutaanerannik misissuissaaq.

Suleqatigiissitaq qanoq iliorluni ineqarnermut akiliutinut akiliinngitsoortarnerit siunissami pisannginnissaannik qulakkeerisoqarsinnaanersoq pillugu isummernissamut tunngavissiamik suliaqassaaq.

Isummernissamut tunngavissiami tassani nalilerneqassapput:

  • Narsami Namminersorlutik Oqartussat inissiaataanni attartortittakkani pisoqaanerusuni attartortunik kommunip inissiaataanut attartortittakkanut nutaanerusunut (siunissami) nuussinissaq.
  • Inissianik attartortittakkanik qanoq iliorluni attartortitsisarnerit attartortut akiliisinnaassusiinut naleqqiullugu aningaasaqarnikkut pitsaanerpaanissaannut qulakkeerisoqarsinnaanersoq misissorneqassaaq.
  • Ineqarnermut akiliutinik naatsorsueriaaseq maanna atorneqartoq naliliiffigineqassaaq, taakkununngalu ilaassapput:

Najugaqarfinni illuartitassatut pisariaqartinneqartut naatsorsornerinut tunngaviusut
Aningaasartuutit, ullumikkut najugaqarfinnit akilerneqartartut kommunini nalinginnaasumik ingerlatsinermut nuunneqarsinnaanerinut periarfissat.

Taakku saniatigut suleqatigiissitaq siunnersuutinik allanik, suleqatigiissitap naliliinera malillugu siunissami ineqarnermut akiitsut qaffannissaasa pinngitsoortinniarnissaanut naleqquttunik saqqummiussisinnaasussaavoq.

Inussiarnersumik inuulluaqqusilluta

Jørgen Wæver Johansen              Knud Kristiansen
Borgmesteri                                Naalakkersuisunut ilaasortaq