Kruse: Nuummi qalerallit 500 tonsit innersuussutaannaapput

Aalisarnermut, Piniarnermut Nunalerinermullu Naalakkersuisoq, Karl-Kristian Kruse, Nuup kangerluani qalerallit killilersorneqartarnissaannik tapersersuinerminik , Nuummi aalisartut piniartullu peqatigiiffiannit paatsoorneqartutut misigisimavoq.

- Peqatigiiffiup ilaasortai isumaqarput Nuup kangerluani qalerallit ukiumut 500 tonsit aalisarneqartartussatut aalajangissagikka, Naalakkersuisuni ilaasortaq oqarpoq.

-  Erseqqissassavarali Nuummi aalisartut peqatigiiffiat ataatsimeeqatigigakku Nuup kangerluani qaleralinnut killilersuilernissamik isumaat tapersersorakku. Pingaartilluinnarparalu suliap ingerlanneqarnerani aalisartut peqatigeqqissaarneqarnissaat, Karl-Kristian Kruse oqarpoq.

- Erseqqissassavaralu nammineerlunga ataasiarlungaluunniit oqaatiginnginnakku Nuup kangerluani killilersuisoqarnissaanik,  Karl-Kristian Kruse oqarpoq.

Nuummi Aalisartut Peqatigiit ernummatigivaat aalisarsinnaasut killilerneqanngippata qaleralik 1980-kutut nungullugu aalisarneqarnissaa.

- Paasivaralu ataatsimeeqataasut arlallit isumaqartut Nuup kangerluani qalerallit killilersorneqalernissaannut aqqutissiuussisoqartariaqartoq, Naalakkersuisuni ilaasortaq erseqqissaavoq.

Pinngortitaleriffik inassuteqarpoq

Pinngortitaleriffik Aalisarnermut, Piniarnermut Nunalerinermullu Naalakkersuisoqarfimmut siorna innersuussuteqarluni allappoq Nuup kangerluani siunissami 500 tonsit sinnerlugit qaleralittarineqartassanngitsut. Taama amerlatigisut 1963-mit 1983-mut aalisarneqarmata, ikiliartuutaanngitsumik aalisarneqarmata – piujuaannartitsisoqarluni.

- Qanga qanoq amerlatigisunik aalisartarsimanerup soqutiginaateqalersippaa siunissami aalisartarnissamut qaleralinnillu aqutsinissamut, Pinngortitaleriffik siorna allappoq.

 

Attavigineqarsinnaavoq Jørgen Isak Olsen, pisortaq, Aalisarnermut, Piniarnermut Nunalerinermullu Naalakkersuisoqarfik. E-mail: jio@nanoq.gl