Pisortat ataatsimoortumik suleqatigiinnerat ingerlateqqinneqassaaq

Naalakkersuinikkut Ataqatigiissaarisoqatigiit Naalakkersuisuni ilaasortanit tamanit borgmesterinit sisamaasunit KANUKOKA-llu siulittaasuanit ilaasortaqartinneqartoq, inuiaqatigiinnut tunngatillugu pisortat ataatsimoorlutik unammilligassaat pillugit ataatsimeeqatigiittarnitik februarip 11-ani aallarteqqippaat.

Illuatungeriit ataatsimiinnerminni akuersissutigaat:

  • Akiliisitsiniartarnermut tunngatillugu suliniutissanik aalajangersimasunik iliuusissatullu pilersaarutinik pisortanut akiitsunik akiliisitsiniartarnerni suliassaqarfimmik nalilersueqqinnissamut aaqqissuussinissamullu tunngatillugu malitseqartitsinissamik imaqartoq.
  • 2015-imut ataatsimoortumik tapiissutit naligiissarnerinut agguartarnerinullu suliap ingerlanissaanut aallaaserisaq.
  • Aaqqissuusseqqinnermik suliap nalilersoqqinnissaanut misissueqqissaaqqinnissat aallartinneqassasut.
  • Ulloq unnuarlu paaqqinnittarfiit kommuninit akisussaaffigineqalernissaannut suliniutit suliassartaasa allaaserineqarnissaat. 
  • Digitalinngorsaanissamut periusissaq pisortallu ataatsimut IT-imik atuinerat pillugu suleqatigiissitap sulinissamini tunngavissaa nutaaq

Naalakkersuisut siulittaasuat Kim Kielsen oqaaseqarpoq:

"Assut nuannaarutigaara suleqatikka kommunineersut ullumi naapissinnaagakkit. Naalakkersuisut nutaat kommunillu akornanni naalakkersuinikkut allaffissornikkullu suleqatigiinneq pitsaasoq ammasumillu ingerlateqqinneqassaaq. Ukiuni aggersuni imaannaanngitsunik unammilligassaqarpugut  suleqatigiinnikkut aaqqinniagassatsinnik. Pisortat ingerlatsineranni aningaasat pisariaqartinneqartut qulakkeerneqarlutillu amerlineqartariaqarput, taamaasiussaguttalu tigussaasumik iliuuseqartariaqarpugut.  Nunatsinni najukkani ataasiakkaanni tamat oqartussaaqataanerat eqqarsaatigalugu unammilligassat aammattaaq qimerloortariaqarpagut. Tamakkulu kommunini ikinngutigut suleqatigalugit ingerlatissavagut.”

KANUKOKA-p siulittaasua Martha Abelsen oqaaseqarpoq:

”Ajornartorsiutit pisortanit aaqqinneqartariaqartut ataatsimoorullugit sulissutigineqartussanngornerat kommunit KANUKOKA -llu pitsaalluinnartutut isigaat. Akisussaaffinnik kommuninut tunniussuinikkut kommunit nukittorsarniarneqarnerat  sulissutigeqqinniarneqarmat kommunit KANUKOKA-llu nuannaarutigaat. Peqatigitillugu aamma kommunit innuttaasunik sullissineranni minnerunngitsumillu meeqqanut inuusuttunullu tunngasutigut aammalu aningaasaqarneq eqqarsaatigalugit kiisalu innuttaasut ulluinnarni inooqataanerminni oqartussaaqataanissaannik qulakkeerinnittussamik qanimut suleqatigiinnikkut kommuninut Namminersorlutillu Oqartussanut attanneqarsinnaasunik aaqqiissuteqarnissaq pingaaruteqarpoq. Taamaattumik aaqqissuusseqqinnermik suliap junimi isumasioqatigiinnitsinni ataatsimoorluta nalilersoqqinnissaanut oqallinnissarput isumalluarfigaarput.”

Ataatsimiinnissap tullia 2015-imi sapaatit akunnerisa 24-ani pinissaa pilersaarutigineqarpoq.

 

Paasissutissanik allanik piniarnissamut attavigiuk:

Naalakkersuisut Siulittaasuat Kim Kielsen, tlf. 34 50 00 imalluunniit KANUKOKA-p siulittaasua, Martha Abelsen, tlf. 36 21 00.