Suleqatigiilluarnissamut periarfissatsialak

Suleqatigiilluarnissamut periarfissatsialaasoq Peqqissutsimut Naalakkersuisunngortup unnerpaa

Doris Jakobsen-ip Naalakkersuisuniit sulinngiffeqarallarnerata nalaani Peqqissutsimut tunngasut Ilaqutariinnermut, Naligiissitaanermut Isumaginninnermullu Naalakkersuisumit Martha Lund Olsenimit akisussaaffigineqalerput. Peqqissutsimut Isumaginninnermullu tunngasut suleqatigiillualernissaannik periarfissatsialaasoq isigaa.

-”Nuannaarutigaara peqqissutsimut akisussaaffik Doris­-ip sulinngiffeqarallarnerani tigusinnaagakku. Periarfissatsialaavoq immikkut isumaginninnermut peqqissutsimullu tunngasut suleqatigiiffiginerunissaannik innuttaasunut iluaqutaasumik” oqarpoq Peqqissutsimut Naalakkersuisoq Martha Lund Olsen nangillunilu:

- ”Ukiorpaalunngortuni isumaginninnermut tunngasut akisussaaffigisimavakka. Piffissamilu tassani sammisat akimorlugit suleqatigiittariaqarnerup pingaassusaa ilisimaarillualerlugu – pingaartumik inuiaqatigiittut ajornartorsiutitsinnut tunngatillugu: atornerluineq, sumiginnaaneq, nakuuserneq imminullu toquttarneq. Suleqatigiinnissaq pisariaqarpoq, ajornartorsiutit iluarsiniassagutsigit. Taamaattumik pitsaaqutitut isigaara, maannakkut peqqissutsimut isumaginninnermilu akisussaaffeqalernera.”

 

Annertunerusumik paasisaqarusukkaanni, attavigineqarsinnaavoq Peqqissutsimut Naalakkersuisoq Martha Lund Olsen-ip allattaa Lea Holm på +299 346605 eller e-mail leah@nanoq.gl