Royal Greenland ineriartupiloorpoq

Royal Greenlandimut, taamaalillunilu inuiaqatigiinnut kalaallinut, ukioq 2014 ukiuuvoq ajunngilluinnartoq. Ingerlatseqatigiiffiup ukiumi naatsorsuusiorfiusumi kingullermi 2011/12-imi angusarissaarnerpaaffigisani angusinnaasimavaa taamaalillunilu aamma akileraarutit ilanngaatigereernagit angusarissaarluavissimalluni. Akileraarutissat ilanngaatigereernagit 199 millioner koruuninik sinneqartooruteqarfiuvoq, akileraarutissat ilanngaatigereernerisigut sinneqartoorutit 136 millioner koruuniullutik, tamatumalu ingerlatseqatigiiffiup 2009-miit aningaasaqarnikkut ilorraap tungaanut ingerlajartulersimaneranik ersiutaavoq. Kisianni akileraarutissat ilanngaatiginagit taamatut angusarissaarnerup fabrikkinik ingerlatseqatigiiffinnillu tunisaqarsimanernit sunnerneqarpoq, tunisaqarsimanerillu pissutaallutik ingerlatseqatigiiffiup ilanngaatissat ilanngaatigereernagit kaaviiaartitai appariarsimallutik.

“Naak massakkorpiaq Royal Greenlandi ingerlalluaraluartoq, oqaatigineqartariaqarpoq taamatut angusarissaarnerup ineriartornera ingerlatseqatigiiffiup siuttuinit sulisuinillu, nerisarfimmi sulisuuguni, aalisartuuguni, suliffissuarni sulisuuguni allaffimmiuuguniluunniit, tulluusimaarutissaammat,” taamak oqarpoq Naalakkersuisut siulittaasuat Kim Kielsen.

Nunatsinni suliffissuaatimini suliassat annertusinerisigut Royal Greenlandip ukiumi naatsorsuusiorfiusumi 2013/2014-imi Kalaallit Nunaanni sulisorisartakkani 8 %-imik amerleriartissimavai. Ineriartorneq nuannaarutissaasoq ingerlatseqatigiiffiup ”North Atlantic Champion”-imik taallugu iliuusissatut pilersaarutaa malillugu ingerlaannartussatut Naalakkersuisunit naatsorsuutigineqartoq.

Naalakkersuisut Siulittaasuat Kim Kielsen oqarpoq:

"Inuusuttut suliffimmi sungiusartut amerlisartariaqarpagut sulisullu piginnaanngorsarlugit, tassanissaaq Royal Greenlandip tamatumuuna iliuuseqaqataanini takutippaa ”Royal Greenlandip piginnaasanik ineriartortitsinera” sulissutigalugu tamannalu aamma suliffeqarfimmik ingerlatsilluarnikkut anguneqarsinnaasoq ersersinneqarpoq.

Tamanna nuannaarutissaavoq Naalakkersuisullu naatsorsuutigaat tamanna ingerlatiinnarneqassasoq, kalaallit inuusuttut amerlanerusut suliffimmi sungiusarfissaqalersinnerisigut sulisullu amerlanerusut ilinniaqqinnissaminnut periarfissinneqartalernerisigut.”

Ataatsimeersuarnermi Tim Ørting Jørgensen, Jan H. Lynge-Petersen aamma Åse Aulie Michelet siulersuisuni piginnaasassat pisariaqartinneqartut aallaavigalugit siulersuisuni ilaasortassatut toqqarneqarput. Taamaalilluni ingerlatseqatigiiffimmi siulersuisuni ilaasortat amerlineqarlutillu nukittorsarneqarput, soorluttaaq ingerlatseqatigiiffiup malittarisassai naapertorlugit siulersuisuni ilaasortassat tamakkerlugit inuttalerneqarsimalersut. 

Assilisat

 

Paasisaqarnerorusuttut attavigisinnaavaat Ingerlatseqatigiiffiit Allattoqarfianni pisortaq Rasmus Pedersen, oqarasuaat +299 34 50 00 imaluunniit e-mail rasp@nanoq.gl.